Shillong, Nailar:
Ka jingïaid lynti jong ka Lalnuntluangi na ka jingshah lehbeiñ sha ka jingjop shaduh bar ri ka dei ka nuksa shaphang ka jingjop bad ki lad ki kabu. Ka jingim jong ka Lalnuntluangi kaba dei na Aizawl, ha Mizoram, ka la kylla hadien ba ka la shah beh na ïing namar ka jingshah leh beiñ ha la u jong u kurim. Ryngkat ba u khun ba dang phra snem, ka Lalnuntluangi ka mad ïa ki jingeh hynrei ka la ïoh jingkyrmen da kaba ka leh ïa ka kam ban die ïa ki tiar ki tar jong ka kompani Swedish Holistic Wellbeing kaba pynmih ïa ki jingtah bad ki jingsleh pynbha briew ha ka snem 2006.
Da ka jingkut jingmut ban ïoh ïa ka lawei kaba ïaineh, ka Lalnuntluangi ka la aiti ïalade ha kane ka kam khaïi, bad ïoh ïa ka nam Director ha ka snem 2008. Une udei u mawmer jong ka dak ka jingsdang ka jingkylla ka jingim jong ka, kaba la lam ïa ka shaduh sha Paris kaba long kum ka jingphoh sniew kaba ka ju mutdur ba kan urlong. Kaba kham kongsan ka long ba ka jingtrei shitom jong ka Lalnuntluangi ka long ban pyntikna ba ka jingpule jong u khun jong ka kan long kaba jop, ban lah ban pyndep ïa ka jingpule MBBS.
Ha Shillong, ka khana jong ka Lalnuntluangi ka la ai mynsiem ïa kiba bun, kaba pyni kumno ki jingtrei shitom bad jingïaineh kumjuh ruh ki jingkyrshan ki lah ban wanrah jingkylla. Ki jingjop jong ka ki sawa jam ha ki ïew ki hat, ha kaba la sakhi ba ka jingïaid lynti jong ka ka ai mynsiem bad ka long ka jingpynkynmaw ïa ka jingtrei shitom, namar wat ki jingangnud kiba khraw haduh katto katno ruh lah ban pynurlong. Ka jingïathuh khana jong ka Lalnuntluangi ka ïai bteng ban ai mynsiem, kaba pyni ba ha man la iwei pa iwei ngi don beit ka jinglah ban jop ïa ki jingeh bad ïoh ïa ka nam kaba khraw.
