New Delhi, Nailar 05
Ka nongïalam ka Bangladesh bad ka Myntri Rangbahduh barim, ka Sheikh Hasina, ka la wan poi sha India ha ka janmiet jong ka Lah Sngi U Blei katto katne kynta hadien ba ka la hap ban hiar noh na ka shuki.
Ka liengsuiñ kaba la kit ïa ka Hasina lem bad ka para jong ka, ka Sheikh Rehana, ka la hiar ha Hindon Air Base kaba dei jong ki shipai suiñ ka India ha Ghaziabad kaba jngai kumba 30 km eiei na nongbah New Delhi.
Ki khubor ki ïathuh ba u National Security Adviser (NSA) ka Sorkar India, u Ajit Doval, u la ïakynduh ïa ka Hasina ha katei ka kad liengsuiñ.
Katkum ki khubor, ka Hasina ka la pan ban ïoh jaka shong jaka sah ha United Kingdom. La ong ruh ba kan leit na Delhi sha London ha ka Sngi Ba-Ar.
Lah ban kdew ba ka para jong ka Hasina, ka Sheikh Rehana, ka dei ka nongshong shnong jong ka United Kingdom. Ka khun jong ka Rehana, ka Tulip Siddiq, ka dei ka MP ha United Kingdom na ka seng Labour Party.
Ka khun jong ka Hasina pat, ka Saima Wazed Putul, kaba long kum ka Regional Director ka World Health Organisation, ka sah ha Delhi.
Ha kaba ïadei bad ka jinglong-jingman ha Bangladesh bad ka jingwan jong ka Hasina sha India, u Myntri Rangbahduh, u Narendra Modi, u la lum da ka jingïalang jong ka Cabinet Committee on Security.
Ha kane ka jingïalang la ïadon u Myntri ka tnat Ïada Ri, u Rajnath Singh, u Myntri ka tnat Korbar Ri, u Amit Shah, u Myntri ka tnat Bar Ri, u S Jaishankar bad ka Myntri ka tnat Pla Tyngka, ka Nirmala Sitharaman.
Lah ban kdew ba ha ka por 3:45 mynsngi jong ka Lah Sngi U Blei, u khlieh-duh ki shipai Bangladesh, u General Waker-Uz-Zaman, u la pynbna paidbah ba ka Hasina ka la hiar shuki noh. Ka Hasina ka la don ha ka bor la 15 snem tam bad ka la ïalam ruh ïa ka seng Awami League.
Ka jingïakhih ki samla pule ha u bnai ba la lah ban dawa na ka sorkar ban pynkylla ïa ka jingbhah ïa ki kam sorkar ka la kylla pynban ka jingïakhih pyrshah sorkar ha kaba palat 300 ngut ki briew ki la ïap.
Ka Hasina ka la shimti kum ka Myntri Rangbahduh ka Bangladesh ha ka sien kaba saw ha ka 11 tarik Kyllalyngkot mynta u snem.
