Shillong, Nailar 05
Ka Bharatiya Janata Party (BJP) hapoh ka Jylla ka la ong ba ka jingpynkhreh na bynta ka ilekshon shiteng samoi ha Gambegre ka la sdang wat la ym pat shym la don mano-mano ba wan shakhmat ban pan tiket na ka seng.
“Ngin ïakhun beit ïa ka ilekshon. Haduh mynta, ngim pat ïoh pdiang ïa ki kyrteng hynrei kumba ka long, ngi la ïaid shakhmat bad ki kam,” la ong u State President ka BJP, u Rikman G. Momin ha ka Lah Sngi U Blei.
“Ki jingpynkhreh ki la sdang ha ki ‘Booth Level’. Ïa mynta, ngin ap shuwa ïa ka rai na ki nongïalam ba halor jong ka seng,” u la ong.
Haba kylli, u President u la ong ba ka jingjied ïa u nongmihkhmat ka shong ha ki paidbah nongthep ‘vote’ ïano ki mon ban jied. Hynrei u la pynpaw ka jingkyrmen ba ki paidbah kin phai khmat sha ka seng kaba trei na bynta u duk u suk bad kaba lah ban wanrah ïa ka roi ka par lyngba ki skhim bapher-bapher.
“Ngi don ha ka Sorkar Pdeng bad ha ka Jylla kumjuh. Lada jia ba ki paidbah ki jied ïa u kyrtong jong ngi, ngin sa wanrah jingkylla ha Gambegre,” la ong utei u khlieh nongïalam ka BJP hapoh ka Jylla.
Kum ban shu kdew hangne, ka konstitwensi Gambegre ka la sah thylli namar ka jingieh noh kam jong u MLA ka Congress, u Saleng A. Sangma ha ka 10 tarik Jylliew mynta u snem hadien ba u la shah jied kum u MP ka Tura Parliamentary konstitwensi ha kane ka ilekshon ba la dep sha ka Lok Sabha.
Hynrei kumba ka long, ka Election Commission of India (ECI) kam pat pynbna ïa ka tarik na bynta ban pynlong ïa ka ilekshon shiteng samoi ha Gambegre.
Ïa kane ka ilekshon shiteng samoi hap ban pynlong hapoh hynriew bnai bad kumta ka lah ban long ha kano-kano ka por mynta u snem.
Katkum ki khubor kiba la mih, la ong ba ka National People’s Party (NPP) ka la ai jingmut ban pynïeng da ka kurim u Myntri Rangbah ka Jylla – ka Mehtab Chandee Sangma ha kane ka ilekshon shiteng samoi ban wan.
Ha kajuh ka por, ka Trinamool Congress (TMC) ka lah ban pynïeng da ka kurim u Zenith Sangma – ka Sadhiarani M. Sangma ha kane ka ilekshon shiteng samoi.
Haba phai pat sha ka BJP, ka kyrteng u State Vice-President bad MDC ka Tura, u Bernard N. Marak, ka la paw hakhmat na bynta ka ilekshon shiteng samoi ha Gambegre. Shuh shuh na ka liang ka Congress ka la pynpaw ïa ka jingkyrmen skhem ban ïoh bat biang ïa ka Gambegre konstitwensi ynda la pynlong ïa ka ilekshon shiteng samoi.
