Shillong, Nailar 05
U paidbhur ha ka Lah Sngi U Blei u la leit ban tur sha ïingsah ka Myntri Rangbahduh ka Bangladesh, ka Sheikh Hasina khlem da kheiñ shuh ïa ka korphiw jong ka tnad shipai da kaba ïaid paidbah ha kylleng ka nongbah ka ri, ka Dhaka.
Ki paidbah ki la kaweh ïa ki lama katba katto-katne ki nongïa-khih ki la shad kmen hajrong jong kawei ka ‘tank’ kaba la pynïeng ha nongbah Dhaka.
Ki durkhih na ki lad pathai khubor ki pyni ïa ki paidbah kiba dang pynjulor ïa ka ïingmala bad shim ïa ka bam ka dih kum ka doh syiar, dohkha, jhur nalor kiwei-kiwei ki jingdon-jingem ha katei ka ïingsah.
Ki lad pathai khubor ka Bangladesh ki la pyni ïa ki durkhih katba ki nongïakhih kiba hapdeng ka jingkmen ki la rung sha ïingsah ka Hasina ha Dhaka, ha ryngkat katto-katne kiba kaweh sha ka kor ring-dur katba ki dang tur sha phyllaw jong ka ïingsah ka Myntri Rangbahduh.
Ki dur khih ki la pyni ruh ïa ki nongïakhih kiba dang pynjulor ïa u mot dur jong u Sheikh Mujibur Rahman, u nongïalam-nongseng jong ka ri, uba dei ruh u kpa jong ka Myntri Rangbhaduh barim, ka Sheikh Hasina.
Kawei ka dur khih kaba la paw pyrthei ka pyni ïa ki nongïakhih katba ki dang pom ïa ka khlieh jong utei u mot dur da u sdie. Ki nongïakhih ki la thang ruh ïa ka shlem treikam jong ka President ka Awami League, ka Sheikh Hasina ha Dhaka.
Ha kajuh ka por, ki la thang ïa katto-katne ki jaka kiba don ha Dhaka ba kynthup ïa ka Bangabandhu Bhaban, ïa kaba la tip kum ka Bangabandhu Memorial Museum, la ong ki lad pathai khubor.
Ka jingleit tur u paidbhur sha ïingsah ka Hasina ka la wan jia hadien bun taïew jong ka jingïakynad kaba jur bad ka jingtyngkhuh bad ki bor ïada. Ki jingïakhih kiba la sdang ha ki taïew kut jong u Jylliew ha ryngkat ka jingdawa ki samla pule ban pynkut noh ïa ka bhah thung kam ka Sorkar ka la ïalam pynban sha ka jingïakynad kaba jur ha kaba ka la don ruh ka jingtyngkhuh hapdeng ki nongïakhih bad ki pulit kumjuh kiba kyrshan Sorkar ha skulbah Dhaka.
Ha kawei ka liang, u khlieh-duh ka tnad shipai ka Bangladesh, u Waker-Uz-Zaman ha ka Lah Sngi U Blei u la ong ba yn sa thaw ïa ka ‘interim government’ hadien ba ka Myntri Rangbahduh ka la ieh noh kam bad phet noh na nongbah namar ka jingïakynad hapoh ka ri.
“Nga shim ïa ka jingkitkhlieh kaba pura,” u la ong.
“Ngin sa thaw da ka ‘interim government’,” la ong u Waker ha ka kyrwoh sha ka ri da kaba bynrap ba ka Sheikh Hasina ka la ieh noh kam.
“Ka ri ka la jynjar biang, ka ïoh ka kot ka la shah ktah, bun ngut ki la shah pynïap – ka la dei por ban pynsangeh shi syndon ïa ka jingïakynad,” u la ong.
“Nga kyrmen ba hadien ka jingkren jong nga, ka jinglong-jingman kan sa manbha,” la ong utei u heh shipai.
Shuh shuh u la bynrap ba un sa ïakren bad u President ka ri na bynta ban thaw ïa ka ‘interim government’ bad ïakren ruh bad ki seng saiñ pyrthei ka liang pyrshah bad ki dkhot ka imlang-sahlang – hynrei ym bad ka Awami League.
