Agartala, Nailar:
U Myntri Rangbah jong ka Tripura u Manik Saha u la pynbna ïa ka song tyngka T. 242.55 klur na ka bynta ban ai jingïarap bad ban wanrah ki kam pynroi ha Gandatwisa Sub-Division jong ka Dhalai distrik, ha ka 4 tarik, Nailar.
U Saha ha ka jingleit jngoh u la leit ïakynduh ïa ki nongshong shnong bad ki bahaïing jong u Parameswar Reang, uba la mynsaw ha ka por ba don ka Ananda Mela ha ka 7 tarik, Naitung bad uba la khlad noh ha ka 12 tarik, Naitung ha GB Pant Hospital.
Kane ka jingjia ka la wanrah ka jingshah thombor jong ki ïing bad ki jingïakhih bajur, ha kaba ka la pynphet shnong ïa kiba bun ki briew bad kiba la hap sah ha ki jaka sah ba shipor.
Ïa u Saha, la synran da u Chief Secretary u JK Sinha, DGP Amitabh Ranjan, DGP (Int) Anurag, Home Secretary Pradip Chakraborty, Dhalai District Magistrate Saju Vaheed, bad u SP u Avinash Rai, na ka bynta ban leit khmih bniah halor ki jinglong jingman ha Gandatwisa.
“Nga la leit jngoh ïa kki thaiñ ba la shah ktah jur bad ïakren ruh bad ki lanot bad kumjuh bad ka longïing jong une uba la ïap,” la ong u Saha. “Ngi la ai jingïarap hashwa sha ki lanot bad sha ka longïing jong u Reang.”
U Myntri Rangbah u la ïathuh bniah halor ka jingai jingïarap sha kine ki lanot, ha kaba u la ong ba la ai T. 6 lak sha ka longïing jong uba la ïap ha kaba la ai shuh sa T. 4 lak ha ka sien kaba saw, T. 95,000 la dep ban ai sha ki 101 tylli ki longïing kiba la shah ktah jur ha ka ban pynbud sa ka T. 2.05 lak, bad ka jingsiew ïa ka bailutksan halor ki jingjulor jong ki jingdon jingem ka la long naduh T. 25,000 haduh T. 1 lak, katkum ki rukom shah pynjulor. Baroh ka la long T. 1.14 klur ba la dep ban sam ha kaba yn sa pyllait shuh sa kumba T. 2.30 klur.
U Saha u la khmih bniah ruh ha kaba ïadei bad ki kam pynroi na ka bynta ka Gandatwisa, kynthup T. 239 klur na ka bynta ban pyntreikam ïa ki projek ba bun kum ka Narayanpur Market, Gandatwisa Ambassa Road, bad ka Cage Farming ha Dombur Lake.
