Shillong, Nailar 05
Namar ka jinglong-jingman ha Bangladesh kaba la poi shaduh u pud ba ka Myntri Rangbahduh ka ri Bangladesh ka Shiekh Hasina ka hap ban wan phet sha India, ka Sorkar Meghalaya ka la rai ban pynjari da ka korphiw ha shilynter jong ki jaka khappud hapdeng ka Meghalaya bad ka Bangladesh, bad ïa kane ka korphiw la pynjari 12 kynta hapoh 200 mitar na khappud.
Ka korphiw ha kine ki 200 mitar na khappud kan treikam naduh 6 baje janmiet haduh 6 baje mynstep man la ka sngi tad haduh ban da pynbna da kumwei pat.
Ïa kane la pynbna da u Symbud Myntri Rang-bah ka Jylla u Bah Prestone Tynsong hadien ba u la lum ïa ka jingïalang jong ki ophisar ka Sorkar Jylla, ki heh pulit lem bad ki heh shipai BSF kaba la long ha Secretariat ha ka Lah Sngi U Blei.
U Bah Prestone u la ong ba ka Sorkar Jylla ka shim lypa ïa kane ka sienjam da kaba pynjari ïa ka korphiw kaba long kum ka jingpeitngor bad khanglad ïoh ba ka don ka jingpyrshang jong ki briew na Bangladesh ban wan rung beaiñ sha India.
Kumta u la kyrpad ïa ki nongshong shnong kiba don ha khappud ban ïaishah bad ai ka jingïatreilang bad ki bor pahara ha kaba ïadei bad kane ka sienjam.
U la ïathuh ba na ka liang ka tnat shipai BSF kan dang pan shuh ïa ki bor pahara na ka Sorkar Pdeng katkum ka jingdonkam namar kumba ka long mynta, ki shipai BSF kiba pahara ha shilynter ki jaka ha khappud ka Meghalaya bad Bangladesh ki long khyndai Battalion.
U la ong ba ka shong ha ki shipai BSF ban pan bor pahara shuh shuh sa katno katkum ka jingdonkam.
Ka Meghalaya ka don ki jaka khappud bad ka Bangladesh kumba 444km bad ki dang don ruh ki jaka kiba khlem pat lah ban ker sainar shiah haduh mynta namar ka jingpyrshah.
U Bah Prestone u la ong ba ka Sorkar ka la bthah ruh ïa ki pulit ka Jylla ban ïarap ïa ki shipai BSF ha kano-kano ka por ba mih ka jingdonkam ha khappud.
Haba kylli shaphang ki jaka kiba khlem ker sainar shiah, u Symbud Myntri Rangbah u la ong ba ki shipai BSF ki la don lypa ki jingtip kiba bniah bad kin leh ïa kaba donkam ha kum kito ki jaka.
Ha kawei pat ka liang, ka Deputy Commissioner ka East Khasi Hills district ka Kong RM Kurbah ka la pynmih ïa ka hukum ban pynjari ïa ka korphiw ha ki jaka khappud ka Meghalaya bad Bangladesh kiba hap ha East Khasi Hills district khnang ban lah tehlakam ïoh don ka jingrung beaiñ kynthup ki dkhot jong ki kynhun lehnoh, ki nongkhaïi beaiñ bad kiwei kiwei ki kam beaiñ ha ki jaka khappud ka India bad Bangladesh.
La ong ba ki jaka khappud ha East Khasi Hills district kiba khlem pat ker sainar shiah ki long kiba kham ma namarba ki lah ban wan rung kiba wan phet beaiñ na Bangladesh kaba lah ruh ban pynthut ïa ka suk ka saiñ hapoh ka district, ka jylla bad ka ri.
Kumta, ka daw ba pynjari ïa kane korphiw ka long ban khanglad ïoh don kiba thmu ban jam sha u pud ka India lane rung tuh, ïoh don ka jingïalum paidbah jong ki briew palat 5 ngut ne kham bun ngut kiba rah ïa ki tiar pynmynsaw ka lah ruh ban pyndonkam ha ki jaka khappud ka India bad Bangladesh, nalor ki kam beaiñ kum ka jingkhaïi beaiñ ïa ka masi, kwai, tympew, ktung, biri, sikret bad kiwei kiwei ki tiar.
