Kyiv, Nailar:
U President ka Ukraine- u Volodymyr Zelensky ha kane ka por u la pynbna ba ki pilot jong ka Ukraine, ki la sdang ban pynher ïa ki liengsuiñ F-16 na ka bynta ki kam ba kongsan hapoh ka ri, da kaba pyntikna ruh ïa ka jingwan jong ki liengsuiñ ïapom ba la shna da ka U.S., kiba ka Ukraine ka la ap kmang la kumba 29 snem naduh ba ka Russia ka la leit hiar thma ia ka Ukraine.
Utei u nongialam ka Ukraine u la pynbna ba ki shipai liengsuiñ ka Ukraine mynta ki la ioh ban pyndonkam ia kitei ki liengsuiñ iapom jong ka US bad u Zelensky u la kren ia kane hapdeng ka jingleit jurip jong u sha ka tnat shipai liengsuiñ ka Ukraine ha ka Sngi U Blei.
Kumta, u Zelensky u la pynpaw ka jingsngew sarong kaba khraw namar ka jingioh pdiang jong ka Ukraine ia kitei ki liengsuiñ thma kiba khlaiñ bor jong ka US ha kum kane ka por ba ka Ukraine ka dang ialeh ban pynbit- pynbiang bad ban pyn-khreh bha ialade naka bynta ban tehlakam ia ka jing-leit thombor ba khlem sangeh jong ka Russia sha Ukraine.
Namar u la ong ruh ba ka jingwan poi jong kitei ki liengsuiñ thma sha Ukraine, ki long u mawjam uba khraw ia ka Ukraine khnang ba kan nang lah ban pynkhreh kham bha bad ban pynkhlaiñ shuh shuh ialade wat lada ka Russia kam pat shym la pyni dak eiei halor ka jingthmu ban leit hiar thma jur biang ia ka Ukraine sa shisien. Kumjuh ruh la ong ba ka Russia ka la thombor bad thmu pynjulor ia kiba bun ki ktem shipai bad ki shlem treikam jong ka Ukraine na ka por sha ka por.
Khnang ba kan ioh ban synshar hi noh ia kitei ki bynta jong ka Ukraine kiba la ioh ban rung bad leh donbor da ki shipai jongka.
Ia kitei ki liengsuiñ F-16s, la shna bad pynbit-pynbiang da ka Lockheed Martin bad la ong ba ka Ukraine ka la dep order lypa na ka US la slem bha namar ka jingkhlaiñ bor jong kitei ki liengsuiñ kiba la shna kyrpang naka bynta ban iakhun pyrshah ia ki nongshun kiba khlaiñ bor. Kitei ki liengsuiñ ki dei kiba la pyndait bad ki 20mm Cannon bad ki lah ruh ban rah ia ki bom, ki roket bad ki ‘namding. Haba iakren bad ki nongthoh khubor ha katei ka sngi, u Zelensky u la pynpaw pat ba ka Ukraine kam pat da bun ki pilot kiba lah ban kiba nang ban pyndonkam ia kitei ki jait liengsuiñ kiba ka Ukraine ka ioh ha kane ka por.
Hynrei, namar ba ka Ukraine ka dang pyn-ap shuh-shuh ia ka jingwan poi jong kitei ki liengsuiñ na ka US, kumta ka la nang pynkhreh bad ai jinghikai lypa ia kitei ki pilot kiba bun lyngba jong kitei ki liengsuiñ kiba ka Ukraine ka la ioh ha kane ka kynti.
