Shillong, Nailar 05
Ki trai kali bad ki nongñiah kali jong ka Hima Mylliem bad Hima Khyrim kiba kit maw bad shyiap kiba don hapoh ka lama jong ka Local Truck Owner and Driver Association, East Khasi Hills District, ki la pynpaw ïa ka jingeh kaba khraw halor ka jingshah khang ki kali kit maw kit shyiap ha kiba bun ki bynta jong ka East Khasi Hills namar ka jingpyntreikam kynsan ka Sorkar Jylla lyngba ka tnad Forest ïa ka kyndon ‘The Meghalaya Mineral (Prevention of Illegal Mining Transportation and Storage) Rules, 2022’ khlem kino-kino ki jingpynbna kiba tikna.
Kane ka jingpyntreikam kynsan jong ka Sorkar Jylla ïa kane ka kyndon ka la pynlong ïa ka kynhun ba kan rai pynsangeh shisyndon ïa baroh ki kali kiba kit maw bad shyiap ban kamai naduh ka 5 tarik u Nailar 2024 kum ka dak ban pyrshah halor kane ka kyndon.
Haba kren sha ki lad pathai khubor, u Bah Egenstar Kurkalang, President ka Association Hima Mylliem and Hima Khyrim Local Truck Owner & Driver Association, u la ong ba ka jingpyntreikam jong ka Sorkar Jylla lyngba ka tnad Forest ïa ka kyndon The Meghalaya Mineral (Prevention of Illegal Mining Transportation and Storage) Rules, 2022, ka la pynlyngngoh ïa ka kynhun namar kam don satia kano-kano ka jingpynshai halor ka jingpyntreikam ïa kane ka kyndon kaba ym long ban kit maw kit shyiap khlem ka ‘Challan’ ka ban ai da ki trai par-maw ne trai par-shyiap bad ka kynhun ka la ïoh jingtip halor kane tad haduh ynda ka la don ka jingshah pynsangeh ki trok kit maw kit shyiap ban kit ïa ki mar ki mata jong ki.
“Kane ka jingeh ka wan na ka daw ba ka Sorkar Meghalaya lyngba ka tnad Forest, ki la wan ban khang ïa ki par-maw bad par-shyiap ha kaba ki la don katto-katne kiba la shah khang ha kiba bun ki bynta jong ka East Khasi Hills kynthup ïa ki thaiñ Laitkor, Umphyrnai, Laitkroh bad sha kiwei-kiwei ki bynta”, la ong u Bah Kurkalang.
U la ong ba ka kynhun ka kyrpad ïa ka Sorkar ba kam pat dei ban pyntreikam pura ïa katei ka kyndon katba kam pat lah ban pynbeit da kumwei pat khamtam ha kaba ïadei bad ka jingpan ïa ka ‘Challan’.
“Kan ap shwa haduh ba ngin da ïoh ban pynbeit katto-katne por. Ngin ai ka jingïatreilang bad ngi khlem ong ba ngin ïaleh pyrshah hynrei ka dei ban don da ka jingïasngewthuh lang”, la bynrap u Bah Kurkalang.
U Bah Kurkalang u la ïathuh ruh ba namar kane ka jingshah khang ki kali kit maw bad shyiap, ka la wanrah ka jingeh kaba khraw ruh ha ki thaiñ nongkyndong khamtam ïa ki longïing-longsem kiba ïoh ïa ka skhim ïing baduk ha kaba ïadei bad ka jingpyntrei ïa ka skhim National Rural Employment Guarantee Act (NREGA) ne ka bylla T.100 shisngi ka la shah ktah shikatdei eh namar ka jingbym don kiba lah ban pynpoi ïa ki mar ki mata.
“Ha ka jingshisha ha shwa ba ka Sorkar kan shna ïa kane ka kyndon lane ban pyntreikam ïa ka ruh, ka donkam ka jingïasyllok bad khlem ka jingpynshai ka pynsah ha ka umdum bad ka jinglyngngoh ïa ki paidbah”, la ong u Bah Kurkalang.
U Bah Kurkalang u la ong ba ka kynhun ka khot bad wer ïa baroh ki trai kali bad ki nongñiah kali kiba kit maw bad kit shyiap na ki katto-katne ki distrik jong ka Rilum Khasi sha ka jingïalang ka ban sa long ha ka 8 tarik u Nailar 2024 ha ka por 10 baje mynstep ha ka ïingdorbar jong ka shnong Umphyrnai ban ïakren bad ïatai halor kane ka aiñ khnang ba ki kali kiba ïaid bad kit ïa ki mar kin nym shah pynthut ha lynti-syngkieñ.
