Shillong, Nailar 05
Ka jinglong-jingman ha Bangladesh ka la nang pynsyier ïa ki nongshong shnong ka India ha khappud ha kaba la saphriang ruh kawei ka dur khih kaba pyni kumba ki briew na Bangladesh ki dang ïalum ha khappud ha ryngkat ka jingpynthaba jingshai lyngba ki mobile phone jong ki.
Ha kane ka durkhih, la ïohsngew ruh ïa ka sur ba ïakren jong ar ngut ki briew kiba kren bynñiaw ïa kata ka jingïalum ki briew na Bangladesh bad kawei ka briew ka la kylli ïa uta uwei la u la dep pyntip ne em sha ki shipai BSF.
Sa kawei pat ka durkhih kaba la saphriang, ka long kumba don ki nong Bangladesh kiba ïa tur sha khappud ha Tamabil, Dawki, tangba ym pat lah ban pynshisha.
Ha kawei pat ka liang, ki shipai BSF ki la pynkhlaiñ ka jingpeitngor ha khappud tang mar ïa jia ka jingjia ha Bangladesh namar ka jingsheptieng ïoh ka don shisha ka jingpyrshang ki briew na Bangladesh ban wan phet sha India.
Ki shipai BSF ki la ïathuh ba ha Jaflong kaba dang hap ha Meghalaya Frontier, la ïoh jingtip ba ki don ki nong Bangladesh kiba pyrshang ban rung sha India ha kaba la la don ka jingpeitngor bha bad ym pat don kano-kano ka jingpynkheiñ kyndon.
