Shillong, Nailar 05
Ka jingdon ki wah bad ki kshaid ha kino-kino ki jaka bunsien ka ju khring ïa ki briew ban wan peitkai bad kylla long ki jaka jngohkai kiba itynnat.
Ka shnong Khlieh-A-Sem kaba hap ha Mawkynrew C & RD Block, East Khasi Hills district ka dei ruh kawei na ki shnong kaba itynnat bha namar ka jingdon jong ki kshaid kiba noh rymphum khamtam ha ka por lyiur.
Ha kane ka shnong ki don lai tylli ki kshaid kiba itynnad, kita ka Kshaid Pdem, Kshaid Sohryng-kiah bad Kshaid Blew Blew.
Wat lada ki briew na kiwei pat ki jaka kim pat da tip bha shaphang kane ka jaka kaba don kine ki kshaid, hynrei kat kiba la ïoh jingtip ki la sdang ban wankai.
Kumta na ka liang ka shnong ha la ka jong ka bor barit ka la pyrshang ban pynneh-pynsah ïa ka jingitynnat bad ban pynbha ïa ki lynti ki syngkien, ka khuid ka suba bad kiwei ki jingdonkam kiba ka shnong ka i donkam ban leh khnang ban khring ïa ki nongjngohkai.
Haba ïakren bad u Sordar ka shnong Khlieh-A-Sem u Bah Shyrman Nongrum u la ong ba ka shnong ka kwah ba ki nongjngohkai kiba wan sha ka shnong, haba ki wan dei ban peit bha ïa ki signboard bad ban kohnguh ïa ki kyndon kiba ka shnong ka buh, khnang ba kan pynsuk bad lait na ki jingeh haba ki wan hapoh ka shnong.
U la ong ba ki lynti ki syngkien ki long kiba dang khohruh-khohram, bad ki don ruh ki lynti khlaw. Dei halor kane ka nongrim ba ka shnong ka kyntu ïa ki nongwankai ba kim dei ban leit na kiwei ki lynti, hynrei ban ïaid na ka lynti kaba ka shnong ka la pynkhreh bad pynbiang.
U Bah Nongrum u la pynpaw ba ka shnong ka dei kaba 99% ki nongshong shnong ki dei ki Khristan, bad dei halor kane ka nongrim ba ka Dorbar Shnong ka khang ïa kane ka jaka jngohkai pyrthei bad kim shah ïa ki nongwan jngohkai ban leit sha kine lai tylli ki kshaid ha ka Sngi U Blei.
U la ong ba ka daw ba ki khang ïa kine ki jaka jngohkai ha ka Sngi U Blei ka dei namarba ki nongpeit kim don bad lada jia kano-kano ka jingjia, ka shnong kan shem jingeh.
Na ka liang ka shnong ka la pyrshang ruh ban pynitynnat bad pynbha shuh shuh wat la kim pat don ïa ki jaka sah na ka bynta ki nong jngohkai. Ka shnong ka la dep ban phah da ki jingthoh sha ka Sorkar ban phaikhmat lem ban pynbiang ïa ki jingdonkam jong ka shnong.
U Bah Mitri Suting uba dei uwei na ki dkhot ka shnong, u la ong ba ka shnong Khlieh-A-Sem ka la sdang paw ha ki kam jngohkai naduh u snem 2022 bad ha shwa jong kane, ka shnong kam pat paw namar ym pat lap ïa ka jingitynnad jong kine ki kshaid.
U la bynrap ba naduh ba ka shnong ka la sdang ban paw ha ka jingitynnat, ki nongwan jngohkai ki la wan na kylleng sawdong jong ka jylla bad wat nabar jong ka jylla ruh ki don shibun kiba la sdang ban wan jngohkai.
Hynrei u Bah Mitri u la ong ba ka shnong ka kyntu ïa ki paidbah ban sumar khuid ym ban bret pathar ïa ki jakhlia, bad u la kyntu ban bret ha ki jaka ba ka shnong ka la pynkhreh khnang ba kan neh ka khuid ka suba ha shnong.
Shuh shuh ka shnong ka la buh da ki briew ba kin ïalam ïa ki nongwan jngohkai lada ki kwah ban don kiba ïalam lynti, hynrei kumba long mynta, kiba bun ki briew ki ju wan hi namar ki la tip ïa ka jaka na ki signboard kiba ka shnong ka la pynkhreh.
Ka jylla Meghalaya ka don kyrhai ki jaka jngohkai, khamtam lada phai sha ki jaka nongkyndong, bad ka thaiñ Mawkynrew ruh ka dei kaba don bun tylli ki jaka kiba itynnat bad khring ïa briew na kylleng kumba long ka Laitlum bad ka donkam ïa ka sorkar ba kan phai khmat lem khnang ba kin lah ban pynitynnat shuh shuh ïa kane ka jaka.
