Khliehriat, Nailar 05
Ka jingbteng u slap ba jur ban ther ha East Jaiñtia Hills District ka la wanrah ïa ka jingtwa khyndew ha ka surok bah National Highway 6 ha ka shnong Kuliang ha ka 5 tarik Nailar.
Kane ka jingtwa khyndew ka la long kaba jur ha kaba kawei ka kali Alto kaba don ïa u nombor AS24-B-2485 ka la shah tap ha ka khyndew bad ki maw kiba tuid nalor lum. Nalorkata, kawei trok ruh ka la sahkut hapdeng surok na kane ka jingtwa khyndew.
Ki pulit jong ka East Jaiñtia ki la pyntip ba ki briew hapoh ka kali Alto ki la ïoh ban mih shwa ban jia ka jingshah tap khyndew bad ki la lait na kano-kano ka jingmynsaw.
Ka jingtwa khyndew ha kane ka jaka ka dei kaba la jia bun sien bad ka la pynthut bha ïa ka ïaid ka ïeng jong ki kali ki motor bad kaba la wanrah ruh ka jingsahkut ha ka leit ka wan jong ki khynnah skul, ki nongpang bad ki briew na kawei ka jylla sha kawei pat.
Haduh ba la thoh ïa kane ka khubor la lah ban pynkhuid ïa ka khyndew kaba twa kumjuh ki maw bah maw san bad ïa ka kali ruh la lah ban sei na ka ktieh.
