Shillong, Nailar:
Ka Dorbar Shnong Malki kan pynlong ïa ka jingjied ïa ki Rangbah Shnong bathymmai ha ka 10/08/2024, Sngi Saitjaiñ naduh ka por 9 baje mynstep haduh 2 baje mynsngi ha Madan Phutbol jong ka shnong Malki.
Ka jingñiew ïa ki ‘vote’ pat kan long ha ka por 3 baje mynsngi ha kaba yn sa pynbna syndon ïa ki nongjop kum ki Rangbah Shnong bathymmai.
Ka Dorbar Shnong ka la rai ruh ban shah tang ïa ki trai shnong kiba shong ba sah ha ka shnong Malki bad jied Rangbah Shnong – kata ka kynthup ïa ki kynthei bad shynrang kiba la kynjoh 18 snem shaneng.
Ki trai shnong kiba la mih bad sah shabar na ka shnong Malki kin ym don hok ban jied ne shim bynta ha ka jingjied Rangbah Shnong.
Ha kane ka sngi, la rai ruh ban khang shnong shipor, kata naduh 9 baje mynstep haduh 2 baje mynsngi ha baroh u pud u sam jong ka shnong Malki.
Kane ka long katkum ka kyrwoh na u Secretary ka Election Committee, Dorbar Shnong, Malki, Bah Anthony N. Nongbri.
