Guwahati, Nailar 06
Ka Kutumba Surakshya Parishad (KSP) kaba dei ka kynhun Hindu ha ka Sngi Ba-ar ka la byrngem ban pakhang ïa ka surok sha Meghalaya kum ka dak ban pyrshah halor ka jingkhang ïa ki ‘riewngeit Hindu ba kin leit lehniam bad duwai ha krem Mawjymbuiñ, Mawsynram.
Lah ban kdew ba na ka liang ka Dorbar Shnong Mawsynram dang mynshem taïew ka la rai ban khang ïa ki ‘riewngeit Hindu ba kin wan lehniam hapoh katei ka krem.
Haba kren sha ki lad pathai khubor ha Guwahati Press Club, u President ka KSP u Satya Ranjan Borah u la ong, “Ngi donkam ïa ka jubab na ki bor khmih ka Jylla Meghalaya, lym kumta, ka Sorkar Meghalaya kan mad ïa ka jingïakhih hangne ha Assam, lehse kaba lah ban dei ka jingpakhang ïa ka surok sha Meghalaya lyngba ka Jorabat (Guwahati), Paikan (Goalpara) bad kiwei kiwei ki surok”.
U Satya Ranjan u la ong, “Ngi dang shu pynsngew ïa kaei kaba ngin leh pyrshah ïa ka jinglong pyrshah ïa ki Hindu. Lada ngi sdang ban leh eiei, kin ym ïoh por satia wat ban khohreh.”
Shuh shuh u la ong, ka shlem treikam u Myntri Rangbahduh ka Ri India bad ka shlem treikam u Secretary General ka United Nation, ki dei ban kylli ïa u Myntri Rangbah ka Meghalaya ban pynshai ïa ka nongrim jong ka Sorkar Jylla.
“Ngi kyntu ïa ka Sorkar Meghalaya ban weng noh mardor ïa kane ka jingkhang bad ki dei ban da pynbeit bha ïa ka jingwan mane ïa u Shiv Ling da ki paid Hindu ban rakhe ïa u bnai ba kyrpang ba la tip kum ka Shraban,” la ong u Satya Ranjan.
U la ong, “Ka krem Mawjymbuiñ ka don ïa u maw ba wan dur kum u Shiv Ling bad ka dei ka jaka mane bad ka Sadhana ki Hindu ha Meghalaya. Bun bha ki ‘riewniam Hindu ki ju leit sha kane ka jaka ban lehniam man la u snem khamtam ha u bnai ka Shravan”.
Ha kajuh ka por, une u nongïalam ka seng Hindu u la buh jingkylli ruh “La ïohi ba bun bha ki briew kiba dei ki paid Khristan bad katto-katne ki seng jong ka Jylla ba synshar da ki Missionary Khristan, ki la khang ïa ki ‘riewngeit Hindu ban leit mane blei hangtei.”
