Mawkyrwat, Nailar:
Ha ka step jong ka 5 tarik mynta u bnai ka la don ka jingsaphriang jong kawei ka dur khih ha ki rynsan social media kaba la jia ha Civil Hospital Mawkyrwat ha kaba la ïohi ba ka don ka thma ktien kaba jur hapdeng u doktor bad kawei ka briew ba wan shim dawai ïa u khun.
Ha kaba ïadei bad kane, ka KSU Mawkyrwat Circle hapoh ka jingïalam u samla Plosbor Kharjahrin, General Secretary wut-wut ki la leit ban ïakynduh ïa ki bor ba dei peit jong katei ka jaka sumar.
U samla Plosbor haba kren sha ki lad pathai khubor u la ong, ka seng halor katei ka jingjia ka sngewkhia namar ka dei tang ka jingbym burom markylliang hapdeng ki nongwan wad dawai bad u doktor kan sa mih katei ka thma ktien namar u doktor u dang bunkam ban peit ïa ki nongpang kiba kham shitom katba katei ka longkmie pat ka la pynbor ïa u doktor ban peit ïa u khun jong ka.
U la ong ruh ba ka seng kam pynrem ïano-ïano hynrei ka kyntu ïa ki paidbah kumjuh ruh ïa ki nongtrei kane ka jaka sumar ba nangne shakhmat kin ïa burom markylliang ha ka ktien ka thylliej khnang ba kum kine ki jingjia kin ym jia shuh hadien.
Ym tang ka KSU, ha kane kajuh ka sngi ka HYC Mawkyrwat Circle bad ka HANM ruh ki la pynpaw ïa ka jingsngewkhia kaba jur halor katei ka jingjia.
U samla Lambokstar Marweiñ, President ka HANM SWKHD u la ong ba ka jingbakla ka la sdang hi na ka longkmie katkum ka jinglap ïa ka jingshisha hynrei ka seng ka la kyntu ïa baroh arliang ba kin ïa panmap noh mar kylliang.
Ha kajuh ka por ka seng ka la pynpaw ïa ka jingsngewkmen namar baroh arliang ki la ïa map markylliang.
