Shillong, Nailar:
Ka Hynñiewtrep Youths’ Council (HYC) Sohïong Zone ha ka 5 tarik u Nailar ka la leit ban ïakynduh bad aiti da ka dorkhas ha ka District Medical & Health Officer (DMHO) ka East Khasi Hills District, Shillong ha kaba ïadei bad ka jingjaw um ka ïing-paki jong ka CHC Sohïong, ka jingsarang jong ki pipe um bad ka jingpyndonkam da ka um kaba sarang ha kane ka Community Health Centre (CHC) bad ka jingleh thurmur ïa ki wire bording ilektrik ha ki ïing-sah (quarter) jong ki doktor bad ki nos.
Haba kren sha ki lad pathai khubor, u Bah Purningstar Shabong, President ka HYC Sohïong Zone, u la ong ba ha ka jingleit jurip jong ka seng ïa katei ka CHC Sohïong ha ka jingdon lang iwei i doktor ba dei pynkhmih ïa katei ka CHC ha ryngkat ki staff, ka seng ka la lap ba ka long kaba sngewsih bad kaba isaitmet ban shem ba ka building jong kane ka CHC ka la jaw um na kiba bun ki bynta.
“Ka jingjaw um jong kane ka building ka pynpaw ruh ïa ka dak pyut ha kaba ka lah ban ktah ha kano-kano ka por khamtam ha ki por slap, ka jingjaw um ka long kaba jur haduh katta-katta”, la ong u Bah Shabong.
U la ong ba ka long kaba isaitmet haduh katta-katta ruh ban shem ba ki pipe um kiba pyndonkam ban sam um ha katei ka CHC kumjuh ruh ha ki jaka sah (quarter) jong ki doktor bad ki nos ki la long kiba sarang ha kaba la hap ban pyndonkam da ka um sarang.
“Kane ka jingpyndonkam da ki pipe kiba sarang bad da ka um sarang ka ktah ïa ka koit ka khiah jong ki briew kiba wan phah sumar ha kane ka CHC bad kumjuh ki nongtrei ha kane ka CHC”, la bynrap u Bah Shabong.
Halor kine ki jingduna kiba don ha katei ka CHC Sohïong, na ka liang ka DMHO ka la ai ka jingkular ba kan sa shimkhia halor kine ki bynta bad kan sa bthah ïa ka tnad ba dei peit ka Engineering Wing ban pynbha ïa ki jingduna baroh kiba don ha katei ka building khnang ba kan nym mih kano-kano ka jingjia ba sngewsih.
Na ka liang ka seng ka la ong ruh ba kan sa ïai buddien ha kaba ïadei bad ka jingleit ïakynduh ïa ki ‘Engineer’ bad kumjuh ruh ban phah da ka jingthoh sha ka Myntri ka tnad ka koit ka khiah ka jylla, ka Dr. Mazel Ampareen Lyngdoh ba kin shimkhia bad leh ïa kaba donkam halor kane ka bynta.
