Nongpoh, Nailar:
Ki nongïalam jong ka Balang U Blei ka jylla kiba dei ki nongpynïaid bad nongkhmih jong ka Jingaiei Rehabilitation Center ha Syadrit, Ri Bhoi District ha ka Lah Sngi U Blei ki la ïoh ban rakhe ïa ka jingdap shisnem ka jingshakri sha ki samla kiba la ngop ha ki jingdih bapher bapher ban pynkylla thymmai ïa ka jingim jong ki.
Ha kane ka sngi, la ïadon ryngkat u CEM ka Khasi Hills Autonomous District Council (KHADC) Bah Pynïaid Sing Syiem, Pastor GA Kharshïing, Pastor M Shangpliang, Pastor R Imiong, Pastor AM Mihsil, Pastor K Nongpluh, ki nongshah sumar ha kane ka jaka lem bad ki para ba ngeit jong ka Balang U Blei.
Na ka liang ki Pastor kiba la ai jingkren ha kane ka sngi, ki la ïathuh ba ka jingïaid lynti ha kane ka shisnem lynter kam dei satia kaba suk, hynrei kaba dap da ki jingeh jingtynjuh kiba bun. Ki la ong ruh ba ha ka jinglong briew, la sngew kum ban pynkut noh ïa kane ka jaka, hynrei dei lyngba ka bor Blei bad lyngba u Jisu Khrist ba ki la lah ban bteng ïa kane ka kam ban ai ïa ka jingim kaba thymmai sha ki samla kiba la ngop ha ki jingdih.
Ki la pyntip ruh kumba long mynta, kane ka jaka ka dei ha ka jingshisha kaba lah ban pynrung tang 10 ngut ki samla ban ai jingsumar, hynrei mynta ki don haduh 12 ngut, naba ar ngut la pdiang ïa ki hadien ka jingpyrkhat sani bad ka jingdonkam ban ai ïa ka jingsumar ïa ki ba kin ïoh ïa ka jingim kaba thymmai ynda ki la mih na kane ka jaka.
U Bah Pynïaid haba ai jingkren, u la pynpaw ïa ka jingsngewkmen ban ïadon bynta ha kane ka jingdap shisnem jong ka jingïaid lynti kane ka Rehabilitation Center ban pynkylla thymmai ïa ka jingim jong ki samla kiba la ngop ha ki jingdih.
U la pynpaw ruh ïa ka jingsngewtynnad ïa kane ka Rehabilitation Center da kaba ong ba kane ka jaka, kam dei satia tangba ka ai ïa ka jingbam kaba tei ïa ka met lane kaba kynja doh, hynrei ka ai ruh ïa ka jingbam kaba kynja mynsiem ïa ki samla kiba wan ban shah sumar ha ka. Shuh shuh, u la ong ruh ba ka por ka la dei ba kito ki samla kiba la lait na u kynjri jong ka jingdih ba kin mih shakhmat ban long kum ki shipai ban pynsaphriang ïa ka khubor ban pyllait ïa kiwei pat ki samla ba kin ngop ha ki jingdih kiba sniew.
Ha kaba ïadei bad ki jingdonkam jong kane ka jaka, u Bah Pynïaid u la pyntip na ka liang ka KHADC kan mang tyngka T.10 lak ban pynheh bad thaw thymmai shuh shuh ïa ki kamra ha kane ka jaka bad pyntip ruh ba hadien ka jingkren ka jong u, u Myntri Rangbah ka jylla, u Conrad K Sangma u la pynmang `.5 lak na ka skhim Chief Minister Special Development Fund ban thied ïa ka Generator ban pynbiang bording ha kane ka jaka.
