Nongpoh, Nailar:
Ki nongïalam ka Ri Bhoi Peoples’ Council (RBPC) ha ka Lah Sngi U Blei, ki la leit ban kynduh ïa u Deputy Commissioner ka Ri Bhoi District, u Abhilash Baranwal ban ïakren halor ka phang jong ka thung kam thung jam kaba ïadei bad ka Ri Bhoi District.
Ha kane ka sngi, ha ka jingïakynduh ïa u DC ka Ri Bhoi, ka RBPC ba la lam khmat da u President, Bah Jayson Lennox Nongrum ryngkat kiwei ki dkhot, ki la ïoh ban ïakren bad ïatai bad utei u heh ka district halor ka bynta ba dei ban pyrkhat shwa nyngkong ïa ki trai shnong ka district ha ka thung kam thung jam ha ki kam bapher bapher kiba la pynlait lyngba ka District Selection Committee (DSC) ka Ri Bhoi.
Haba kren sha ki lad pathai khubor, u Bah Jayson u la ong ba ka daw ba kongsan kaba la pynlong ïa ka seng ban mih shakhmat ban kren halor kane ka bynta ka dei halor ka nongrim ba kum ka seng kaba peit bad khmih ïa ka khia ka shon jong ka district, ki don ïa ka jingangnud ba ka jingthung kam ha ki kam bapher bapher jong ka DSC ka Ri Bhoi, ki bor synshar jong ka district lane ki nongmihkhmat ba dei khmih halor kane ka bynta, ki dei ban phai khmat kyrpang shwa ïa ki samla kiba dei ki trai ri trai muluk bad ki trai shnong jong ka district kumba ka East Khasi Hils District, ka la dep ban pynmih ïa ka jingpynbna thung kam.
Utei u nongïalam ka RBPC u la ong ruh ba ka jingkynduh ïa u DC ka long kaba seisoh naba u la kular ban shimkhia bad wad jingtip kiba bniah halor kitei ki mat kiba la wanrah da ka RBPC ha kaba ïadei bad ki kam bapher bapher kiba la pynmih da ka DSC Ri Bhoi District.
