Shillong, Nailar 06
Ka Meghalaya Wushu Association ka la ïoh ïa kabu ksiar ban pynlong ïa ka lympung ïalehkai Khelo India Women’s Wushu League na ka bynta ka East Zone ka ban sdang naduh 9 haduh 12 tarik mynta u bnai ha NEIGHRIMS.
Ka jingpynlong ïa kane ka lympung ka long na ka bynta ka East Zone kaba kynthup ïa ki phra tylli ki jylla jong ka thaiñ shatei lammihngi kynthup ïa ka Sikkim, nangta ka Bihar bad ka West Bengal.
Ïa kane ka lympung la ai jingbit da ka Wushu Association of India ha ryngkat ka tnat ïalehkai jong ka Sorkar Pdeng lyngba ka Sports Authority of India.
Kat kum ka jingiathuh da u President ka synjuk u Bah Donny Raphael Ranee u la ong ba ki nongjop ha kane lympung kin ioh ia ka lad ban iakhun pat ha ka wat kaba kham kongsan pyrshah ia ki nongjop ha la ki jong ki zone.
“Ki nongialehkai kiba ban khur takma ha manla ki zone kin ioh ia ki khusnam pisa kaba long T. 5000, T.3000 bad T.2000. Katba ki nongjop ha ka wat kaba kham kongsan ne ka main draw jong ka All India kin ioh ia ki khusnam pisa kiba T.20,000, T. 15,000 bad T. 10,000 na ka bynta kiba khur ia ka takma ksiar, rupa bad rnong,” u la bynrap.
