Seoul, Nailur:
Ka North Korea ha kine ki khyndiat sngi ba la leit, ka la phah haduh 250 tylli ki ‘namding ‘Ballistic Missile’ sha ka phang South ha khappud jong ka, ha kaba u nongialam ka North Korea- u Kim Jong Un u la pynbna ba kitei ki ‘namding ki long kiba khlaiñ bor haduh katta bad yn pyndonkam ruh ia ki na ka bynta ka jingshngaiñ bad ban ïada ia ka ri na ki nongshun.
Ia kitei ki ‘namding la pyni hapdeng ka tamasa ba la pynlong kyrpang da ka North Korea ha katei ka jaka ban pyni ia ka jingpynpoi ia kitei ki tiar thma sha ka nongbah Pyongyang ha ka Sngi U Blei.
U Kim ha katei ka sngi haba ai jingkren sha ki shipai bad sha ki paidbah, u la ong ba kitei ki ‘namding ki long kiba paka bad kiba khlaiñ bor bad kiba la shna pynwan dur bad pynbit- pynbiang katkum ka buit bad ka jingstad jong kane ka juk ba mynta.
Hynrei, la ong ba ka long ka sien ba nyngkong eh ba ka North Korea kan pynpaw pyrthei haduh katei tylli ki ‘namding ba ka la pynpoi sha katei ka bynta khappud jongka, la iathuh ka Korea Association of Defence Industry Studies.
La ong ba ia uwei pa uwei u ‘Launcher’, la shna ha kata ka dur ba un lah ban bat ne thep pynrung haduh 4 tylli ki ‘namding (missiles) ha kajuh ka por.
Namar, la ong ruh ba ka jingiadei hapdeng jong kitei ki 2 tylli ki ri Korea ha kine ki sngi ka la nang sniew shuh- shuh kat nang iaid ki por, ha kaba ka North Korea ka la pynkhreh ia ki tiar thma jongka bad ka la dep pyni bor ruh ia ka South Korea da kaba leit pynher ia ki balloon kiba la thep bad pynkit da ki jakhlia ban leit bret bad pynhap dusmon sha South Korea.
Kumjuh ruh na ka liang ka South Korea, ha kane ka kynti ka la pynbna ia ka jingbym long shngaiñ shuh jong ka South Korea ha ki bynta khappud ba markhap bad ka North Korea.
La ong ruh ba dei ha une hi u snem, ba ka North Korea ka la pynbna syndon ia ka South Korea kum ka nongshun ba hakhmat duh jongka.
Namar u Kim u la ong ba ka jingpynpoi ia kitei ki tiar thma sha katei ka bynta khappud ha kum kane ka por ba ka ri ka mad ia ki jingjulor bad ki kynrum- kynram namar ki jingjia shlei um ha kine ki khyndiat taiew ba la leit, kan long naka bynta ka jingshngaiñ jong ka ri hi namar ym lah tip ha kano ka por ba ki nongshun kin shim kabu ban leit thombor ia ka North Korea bad kumta ka long kaba donkam ban pynkhreh lypa namar kane. Haba iadei bad kane, la ong ba ka North Korea ka la ioh mad ia u slap uba jur ha ki khyndiat taiew ba la leit jong une u bnai ba la lah, ha kaba la ioh jingtip ruh ba ki don palat 1,500 tam kiba la khlad bad duh ei ia ka jingim ha ki jingjia bapher namar katei ka jingjur slap.
Hynrei, u Kim u la iathuh ba ym shym la don ba ngat ne khlad ha kitei ki jingjia na ka thaiñ Sinuiju baroh kawei.
Namar u la pynksan ruh ba ka tnat shipai liengsuiñ jong ka North Korea, ka la ioh ban pyllait im ia palat 5000 tam ki paidbah nongshong shnong na katei ka thaiñ bad kumba 4,200 ngut ki dei kiba la ioh ban kyntiew bad kit noh da ki ‘helicopter’.
