Jowai, Nailar 06
Ka Mookaswan Dongwah ka la ïoh jingjop, katba ka Pasyih Cultural bad Lumkhangdong Tuber ki la ïakhaid ha ka lympung ïalehkai 4th Adelbert Laloo Memorial Trophy-3rd Division Football Tournament ba la pynïaid da ka West Jaiñtia Hills District Sports Association (WJDSA).
Ha ka jingïakhun kaba la long ha ka Sngi Ba-ar ha Kiang Nangbah Stadium, Jowai, ka Mookaswan Dongwah ka la pynliem noh ïa ka Khliehshnong Ïalong da 2-0 kol. Ïa kine kol la thep da u Emiianga Phawa ha ka minit 20 bad u Monjurlang Suchiang ha ka minit 30.
Ha ka jingïalehkai kaba bud hapdeng ka Pasyih Cultural bad ka Lumkhangdong Kyndong Tuber ki la ïasam mar shi point hadien ba ki la ïakhaid mar 1-1 kol. Ka Lumkhangdong ka la pynkhih jar nyngkong eh lyngba u Phorki Shyrmang ha ka minit kaba 30, hynrei hadien saw minit ka Pasyih ka la lah ban pynphai kylla lyngba u Sambun Dkhar.
