New Delhi, Nailar:
U Secretary of State jong ka US- u Antony Blinken ha ka Sngi U Blei u la maham tyngeh ia ka Israel ba ka Iran bad ki lehnoh Hezbollah na Lebanon ki lah ban thombor noh shen ia ka Israel ha kano-kano ka por bym poi pyrkhat.
Ka Hezbollah, ka long ka kynhun lehnoh ba shyrkhei ba la seng ha ki snem 1980 da ka jingkyrshan jong ka Iran. Kane ka kynhun lehnoh ka la ioh jingkyrshan ruh na ka Islamic Revolutionary Guard Corps (IRGC) bad bun na ki dkhot jong ka ki dei na ka jaitbynriew Shiite Muslim jong ka Lebanon.
Namar ka Iran ha ka Sngi Saitjaiñ, ka la pynbna ba ka Hezbollah kan sa leit ban thombor pyrshah ia ka Israel hapoh u pud- u sam jong ka Israel bad kan ym ktah tang ia ki ktem shipai ne ki jaka shipai ka Israel hynrei kan thombor naphang ia kat ki thaiñ kiba ka sngew bit ban sdang ia katei ka kam. Kane ka long ruh hadien ba ka ka Israel ka la leit thombor bad shim ia ka jingim jong u nongialam ba hakhlieh duh jong ka lehnoh Hamas- u Ismail Haniyeh, ha kaba ka Iran bad ki lehnoh Hamas ki la byrngem ba kin pynhiar kput ia ka Israel halor ka jingiap jong utei u nong-ialam ka Hamas.
