Shillong, Nailar 06
Hadien ka jingshah pynslem jong ki nonghikai skul kiba don hapoh ka lama jong ka Meghalaya Sarva Shiksha Abhiyan School Association (MSSASA) ban ïoh ïa ka tulop jong ki na ka Sorkar Jylla, ka la pynlong ïa katei ka kynhun ban wad ïa ki daw tynrai ha kaba ka la lap ba ka daw ka dei namar ka jingïakhih ki nongtrei na ki skul bapher-bapher kiba don hapoh ka lama jong ka All Meghalaya SSA Non-Teaching Staff Association (AMSNSA) kaba dang ïaid haduh mynta.
Haba kren sha ki lad pathai khubor ha ka 6 tarik u Nailar 2024 hadien ka jingwan ïakynduh ïa u State Project Director, u Swapnil Tembe, u President ka MSSASA, u la pyntip ba kum ka seng ka la dep ban ai ruh da ka jingthoh ha utei u heh Sorkar ha ryngkat ka jingdawa ban pyllait noh mardor ïa ka tulop jong ki nonghikai MSSASA kaba dei jong u bnai Naitung.
Shuh shuh u Bah Aristotle u la ïathuh ba na ka liang ka tnat pule puthi ka Sorkar Jylla ka la dep ban pyllait ïa ka hukum ba la mynjur sha baroh ki distrik ha ka 25 tarik u Naitung 2024 na ka bynta ban siew ïa ka tulop jong ki nonghikai SSA kaba dei jong u bnai Naitung.
“Hynrei kaba pynlyngngoh ïa ngi haba ngi leit buddien sha ki distrik, ngi la ïoh jingtip ba ka daw kaba la pynslem ïa ka tulop jong ngi ka long na ka daw ba ki Non-Teaching Staff ki ïakhih”, la ong u Bah Rymbai.
U la ong ba na ka liang ka Association ka la pynsngew sha u State Project Director ba kum ka Association kam don eiei ban ong halor ka jingïakhih jong kite ki nongtrei SSA namar ki don ïa ka hok ba kin pynlong ïa ki jingïakhih katkum ka Riti Synshar ka Ri. Hynrei kum ki nonghikai SSA ruh ki don ïa ka hok katkum ka jingpynkupbor lyngba ka Article 21 bad 300(A) jong ka Riti Synshar ka Ri, ba ym don hok ban bat ïa ka tulop jong ki namar ki nonghikai SSA baroh ki im bad ki pyndap haïing-hasem da ka tulop kaba ki ju ïoh ym da kiwei-kiwei pat ki lad ki lynti.
Ha kajuh ka por na ka liang u Bah Aristotle u la pyntip ruh ba lada ka Sorkar kam lah ban pyllait mardor ïa ka tulop jong ki nonghikai SSA da kaba kynnoh ba ka dei na ka daw jong ki nongtrei SSA, kum ka seng ka la maham ba lada jia eiei ïa ki nonghikai SSA, ki Non-Teaching Staff jong ka SSA kin hap ban shim ia ka jingbahkhlieh.
“Kane ka jingïakhih jong ki bad kane ka jingpynslem ïa ka tulop jong ngi ka lah ktah shikatdei eh ïa ngi ki nonghikai SSA bad na ka liang jong ngi, ngi la dawa lyngba u State Project Director ba u dei ban pyllait noh mar-mar ïa kane ka tulop jong ngi bad lada kane kam urlong, na ka liang jong ki Non-Teaching Staff lada jia eiei ïa ki nonghikai SSA lane lada mih kano-kano ka jingïakhih, kin hap ban shim ïa ka jingkitkhlieh”, bynrap u Bah Rymbai.
