Gaza, Nailar:
Ka tnat ïada jong ka Gaza, ha ka Sngi U Blei ka la pyntip ba ka jing-leit ther bom jong ka Israel sha ar tylli ki skul hapoh ka nongbah Gaza, ka la shim ia ka jingim jong palat 30 ngut ki briew kiba don ha katei ka jaka.
Kane ka la nang kyntiew ia ka jingkheiñ jong ki skul hapoh Gaza kiba la shah ther bom ha ka Israel sha 11 tylli kynthup ia kitei 2 tylli ki skul kiba la julor ha ki bom jong ka Israel ha katei ka sngi. Katba ka jingkhlad jong kito kiba ngat ha baroh 11 tylli kitei ki jingjia ka la poi kumba 150 ngut kiba duh ei noh ia ka jingim namar katei ka jingleit hiar thma jong ka Israel hapoh Gaza.
Kitei ki 2 tylli ki skul ki kynthup ia ka skul na Hassan Salameh bad kawei pat na Al-Nasr, ha kaba ki la don ruh katto katne ngut kiba la mynsaw na katei ka jingjia.
Hynrei kaba kham sngewsih ka long ba kham bun na kitei kiba khlad bad mynsaw ruh, ki dei hi ki kynthei bad ki khyllung-khynnah.
Namar la ong ba ia kitei ki iing skul, la ju pyndonkam kum ka jaka-sah naka bynta kitei ki paidbah nongshong shnong ka nongbah Gaza kiba la kylla phetwir bad ki bym shym la don iing- don sem shuh naduh ba ka Israel ka la leit ban hiar thma ia ka nongbah Gaza.
