Dhaka, Nailar:
Katkum ki khubor, la iathuh kumba shispah tam ki la khlad na ka jingiakynad ha Bangladesh hadien ba ka Myntri Rangbahduh jong katei ka ri- ka Sheikh Hasina ka la pynbna ba ka la ieh noh ia katei ka shuki nongialam jong ka ri bad ka la phet noh syndon ruh shabar jong ka ri Bangladesh ha ka Lah Sngi U Blei.
Ha ka jingshisha, la ong ba ka jinglong jingman ha katei ka ri, ka la kham jai-jai ha katei ka Lah Sngi U Blei shuwa ba ki paidbah kin tip ia ka jingieh-noh kam jong katei ka Myntri Rangbahduh katei ka ri, ha kaba ka leit – ka wan jong ki paidbah ka la sdang ban long biang kumba ju long baroh shi katta bad ki kali paidbah ki la sdang ban mih bad iaid biang ha ki surok bad ki lynti- ki synkien.
Pynban, la ong ba tang mar ia bna ia ka khubor ieh-noh kam jong ka Hasina ha katei hi ka sngi, da ki spah ngut ki riew paidbah ki la leit ban tur sha ka jaka sah jong katei ka nongialam bad ki la lynthem bad pynjulor ia katei ka jaka sah jong ka baroh kawei bad don ruh kiba la lute ia ki jingdon- jingem napoh katei ka iingsah ba ka ju shong- sah baroh shi katta.
