Shillong, Nailar 06
Ka Voice of the People Party na Pynursla Circle ka pynpaw ka jingsngewkhia halor ka jingpynbna korphiw jong ka Sorkar Jylla ha ki thaiñ khappud bad ka ri Bangladesh.
Katei ka jingpynbna ka la mih ha ka Lah Sngi U Blei na u Symbud Myntri Rangbah ka Jylla, Bah Prestone Tynsong hadien ba ka jingïakhih paidbah ha Bangladesh ka la nang jur kat haduh ba ka Myntri Rangbahduh ka ri ka la hap ban phet rieh noh shabar ri.
“Ka seng kam pyrshah ïa katei ka jingpynbna korphiw hynrei ka kyntu ïa ki paidbah jong ka thaiñ ba kin long kiba peitngor bad husiar bha ha kiba kum kine ki por khamtam eh ha ki kynta jong ka korphiw. Lada la pynjari ïa ka korphiw bad ym biang ki shipai pahara ha shi lynter u pud bad ki paidbah ruh ki ïohthiah lyngngai ha la ïing, ka lah ban long pynban ka jingailad ïa ki nong Bangladesh ban wan krih suk shapoh Meghalaya,” la ong Joint Secretary ka VPP (I/C Pynursla konstitwensi), Bah Shemborlang Rynjjah ha ka kyrwoh.
U la ong ruh ba kumba ka long mynta, kam don kano-kano jingktah ïa ka shongsuk-shongsaiñ ha ki thaiñ khappud na katei ka jingjia ha Bangladesh bad la sngewthuh ba katei ka korphiw ka long tang ka lad jingïada.
Kumta ka VPP ka kyntu ïa ka Sorkar ba kan pyntikna ïa ka shongsuk-shongsaiñ jong ki paidbah ha ki thaiñ khappud bad ruh ban pynkhlaiñ ïa ka jingpahara ha kiba kum kine ki por. Ka seng ka kyntu ruh ïa ki paidbah ba kin long kiba sian bad peitngor bha ha kaba kum kane ka khep.
