Dhaka, Nailar 06 (UNI)
Ki nongïalam jong ki samla pule kiba la pynlong ïa ki jingïakhih ha Bangladesh ki la kren shai ba kin ym pdiang da ka sorkar ba ïalam ne kyrshan da ki shipai, bad ki la ban jur ba kin pdiang tang da ka sorkar kaba ki samla pule ka ai jingmynjur.
Katkum ka kot khubor ‘Daily Star’ na Bangladesh, la ïathuh ba u Nahid Islam uba dei uwei na ki nongïalam ki samla pule u la ong ba lait noh na ka sorkar ba ki samla pule kin ai jingmut, yn ym pdiang satia da kiwei pat ki sorkar. U la ong ruh ym pdiang ïa ka sorkar ba la ïalam ne kyrshan da ki shipai ne ka sorkar ba la ïalam da ki nongsynshar donbor.
Ki samla pule hapoh ka lama jong ka Anti-Discrimination Student Movement ki la sdang da ki jingïakhih ba tyngeh ha ka Sngi U Blei ha Dhaka bad ha baroh kawei ka Ri. Ka la don ruh ka jingïakynad bad ki bor pahara bad ki nongkyrshan jong ka sorkar, bad ha ka Lah Sngi U Blei, ka Sheikh Hasina ka la hap ban iehnoh ïa ka shuki Myntri Rangbahduh bad wan phet sha India.
Shuh shuh u Nahid Islam u la kyntu ïa u President ka Bangladesh, u Mohammed Shahabuddin ban shim noh mardor ïa ki sienjam ban wanrah biang ïa ka shongsuk- shongsaiñ ha ka Ri. Ha kajuh ka por u la kyntu ba dei ban pynbna noh ïa ki kyrteng jong kito ki ban don ha ka sorkar ba shipor.
U Islam u la ong ba ki la rai ban ailad ïa ka jingthaw da ka sorkar ha kaba u Dr Mohammad Yunus uba dei ruh uba la ïoh ïa ka khusnam Nobel Prize un long u nongaibuit ba rangbah lane u Chief Adviser. U Islam u la ong ruh ba u Yunus u la dep ban ai jingmynjur halor kane ka jingtyrwa ba un shimti ïa kata ka kam.
Shuh shuh u la ong ba tad haduh ban da lah ban thaw da ka sorkar bathymmai, ki samla pule ki dei ban don ha surok ban ïada ïa ka jingïakhih ka jong ki. Ha kajuh ka por, u la ong ba kane ka jingïakhih ki samla pule kam don jingïadei eiei bad ki kam ïaumsnam, jingthombor ïa ki temple, jinglute bad kiwei.
“Ngin hap ban ïada ïa ki rit paid, ngin hap ban ïada ïa ki jingdon-jingem jong ki paidbah, bad ngin hap ban ïada ïa ka Ri,” la ong utei u nongïalam.
