Shillong, Nailar 06
U paidbhur ha Bangladesh u la leit thang bad pynjulor ïa ka Indira Gandhi Cultural Centre (IGCC) ha nongbah Dhaka bad ka la don ruh ka jingpynpra ïa u mot dur jong U Syiem Tirot Sing uba don ha kane ka shlem.
Kane ka la jia ha ka Lah Sngi U Blei, bad ka dur-khih jong katei ka shlem kaba la julor ka la saphriang kylleng ha ka Sngi Ba-Ar.
Ka jingshah pynjulor jong u mot dur U Tirot Sing ka la wan tang hadien katto-katne bnai ba la plie paidbah. Ïa une u mot dur la plie ha katei ka shlem ha Dhaka ha ka 16 tarik Rymphang, 2024, da u Symbud Myntri Rangbah, u Bah Sniawbhalang Dhar, ha ka jingdonlang jong kiwei pat ki kynrem ki lyndan.
Lah ban pynkynmaw ba ïa u mot sah nam jong u Tirot Sing Syiem u la buh bad plie ha Indira Gandhi Cultural Centre ha ka 16 tarik Rymphang, 2024.
Haba pynrem jur ïa katei ka jingshah pynpra u mot dur jong u Tirot Sing, u Myntri Rangbah ka jylla, u Conrad K Sangma, mynta ka sngi u la kynthoh ha rynsan ‘X’ da kaba ong, “Nga pynrem jur ïa ka jingpynpra ïa ka mot dur U Tirot Sing Syiem, u khlawait ka Ri Khasi bad u nongïaleh laitluid na Meghalaya, ha Indian Cultural Centre in Dhaka, Bangladesh. Nga kyntu ïa ki bor ba dei khmih ban shim ïa ki sienjam kiba donkam khnang ban lait na ka jingjur ka jingïakynad.”
Ka jingshah thang jong katei ka shlem bad jingpynpra ïa u mot dur U Tirot Sing ka la wan katto-katne kynta hadien ba ka Sheikh Hasina ka la hiar noh na ka shuki Myntri Rangbahduh ka Bangladesh. Hadien ba ka la hiar shuki, ka la wan phet noh sha India bad haduh mynta, ka dang don ha kane ka Ri.
Lah ban kdew ba ïa ka IGCC la plie ha u Lber 2010 bad ka dei ka shlem kaba kyntiew ïa ka jingnang jingtip halor ka deiriti jong ka India bad Bangladesh da kaba pynlong ïa ki jingïatai, jingïasam jingtip bad kiwei. La ju wanrah da ki nonghikai Yoga, Hindi, jingrwai bad jingshad sha katei ka shlem khnang ban sam jingtip lem sha ki nong Bangladesh.
Ka IGCC ka dei kaba la peit la khmih da ka Indian Council for Cultural Relations of India, bad ka don ruh palat 21,000 tylli ki kot pule ha ka liang ka deiriti, saiñpyrthei bad kiwei-kiwei na India.
