Imphal, Nailar:
Ha ka jingpyntreikam kaba kham kyrpang kaba la pynlong ha ka 4 tarik, Nailar, ki pulit jong ka Manipur ki la ïoh ban kem ïa ar ngut ki dkhot jong ka kynhun ba la shah ñiew beaiñ ka KYKL. Ïa kine kiba la shahkem la tip kyrteng kum u Maibam Roshan Singh uba la tip ruh da ka kyrteng sin Kishan, 38 snem ka rta bad u Maibam Naocha Singh, 36 snem ka rta. Kine ki la donkti ha kiba bun ki kam beaiñ, kynthup ha kaba ïadei bad ka jingrahbor na ka bynta ka jingdawa pisa bad ka jingdawa pisa na ki heh spah kum na ki jaka tylliat maw bad ki dukan die Mobile.
Ha ka por ba ki la shahkem, ka kynhun pulit ka la ïoh ban kurup ïa kiba bun ki tiar pyndonkam kynthup saw tylli ki Mobile Handset, ka pla thep pisa, ka Aadhaar Card, bad ka pisa kaba T. 11,950 bad ka kali saw shaka. Kine ki tiar baroh ki dei kiba don jingïadei bad ki kam dawa jong ki.
Ha kawei pat ka jingjia kaba la jia ha ka 5 tarik, Nailar, ki shipai ïada ri ki la ïoh ban kem ïa u Budha Meitei,ba la tip ruh kum u Daimal, uba la 38 snem ka rta, uba long u nongïarap jong ki kynhun lehnoh jong ka kynhun United Revolutionary Front (URF) na Salungpham Bazar kaba don ha Thoubal distrik. Une uba la shahkem u la donkti ha kiba bun ki kam dawa pisa na kylleng ki jaka, kynthup na ki jaka shna mawit, ki jaka pule, ki nongtrei sorkar bad na ki riewpaidbah jong ka Thoubal distrik. Ki pulit ki la lap ïa ka pistol ha ryngkat lai tylli ki kuli bym pat pyndonkam, ka shithi dawa pisa, ka kali arshaka, ar tylli ki Mobile Phone bad lai tylli ki SIM Card na u Meitei.
