Shillong, Nailar 06
Ka Umpling SC ka la sdang da ka jingjop ha ka lympung ïalehkai Third Division Football League 2024 ba la pynïaid da ka Shillong Sports Association. Kane ka wan urlong hadien ba ka la lah ban pynliem ïa ka Mawkriah West SC da 2-1 kol ha ka Sngi Ba-ar ha SSA Stadium, Polo.
Kane ka nam jop ka la wan urlong lyngba u Adony Riwan bad u Busel Lyngshiang na ka bynta ban khur ïa ki lai point.
Ha kane ka jingïakhun kaba nyngkong jong ka Group-C, ki rangïalehkai ka Umpling SC ki la pyrshang ban ïakhun tyngeh ha kaba ka la ïoh ban pynkhih jar nyngkong eh lyngba u Adony Riwan ha ka minit kaba nyngkong bad ïa ka kol kaba ar ka la ïoh ban thep ha ka minit kaba 20 lyngba u Busel Lyngshiang.
Ka Mawkriah West ka la lah ban pynphai kylla shi kol lyngba u Honour Nongbri ha ka minit kaba 75 hashwa ba kan mad ïa ka jingshah rem kaba nyngkong eh ha kane ka lympung.
Ka jingïalehkai ha ka sngi Balang kan long hapdeng ka Lawmali Pyllun SC pyrshah ïa ka Lumdiengjri SC ha ka por 1 baje nohphai sngi.
