Naduh u bnai ba la lah bad haduh kine ki khyndiat sngi ngi la ïohi lyngba ki lad pathai khubor halor ki jingïakhih kiba I shyrkhei ha Bangladesh haduh ba ka Myntri Rangbahduh, ym tang ba ka la hap ban iehnoh kam, ka la hap ban mih noh syndon na ka la jong ka ïing ka sem bad ka khyndew ka shyiap bad ban wan wad jaka sah ha India. Ïa mynta, ka jingjai-jai ka la sdang ban wanphai suki-pa-suki watla ka Bangladesh kam pat lah ban thaw da ka sorkar ba shipor ka ban ïalam pat ïa ka Ri hadien ba ka Sheikh Hasina ka la hap ban hiar shuki. Ka kynrum kynram kan ym pat kut katba kathie ka Ri kam pat ïoh da ka sorkar ka baskhem.
Kawei kaba ngi ïohi na kane ka jingïakynad ka long ka jingdon jong ki nongpynshit ha ki rynsan “Social Media” ba ha Meghalaya ruh dei ban ïakhih kumba long ha Bangladesh. Kane ka rukom kynthoh ki nongpynshit bad kiba shongshit khlem nongrim ka long kaba ma. Ngi kyntu ïa ki paidbah ba kim dei ban ïa pynleit jingmut ha kiba kum kine ki jingkynthoh khlem nongrim. Kan don jingmut aïu ban ïakhih haduh ban da ïap da ki spah ngut ki paidbah khamtam kiba lui-lui? Shaei kan ïalam? Ha ka Ri kaba la shai, donkam da ki jingïakren ban ïapynbeit ïa ki jingeh jong baroh. Ka jingïaumsnam kan ym ïalam sha kano-kano ka lawei kaba bha. Ïa kane ruh ngi la dep ban sakhi ha la ka jong ka jylla ha ki snem kiba mynshwa ha ka por ba dang don ki briew kiba kieng atiar. Mano kiba dang kwah ban mad biang ïa kito ki sngi kiba dum? Sa tang kiba pan kwah bad kin sa thngad ynda ki la mad. Ngi dei ban sngewthuh ba ka ding kan ym lah ban pynlip ïa ka ding. Donkam da kiwei pat ki lad ban pynlip ïa ka ding.
Ngi hap ban ïakren halor ka Bangladesh namar ka dei kaba marjan tam bad ngi, bad lada jia eiei hangthie, kan ktah ïa ki paradoh parasnam kiba sah hangthie kiba dei ki rit paid, bad hadien kata, kan ktah ïa ngi lang salonsar. Ngim dei ban shu leh shongshit halor kine ki jait kam. Ngin hap ban da ïa pyrkhat da ka jingmut kaba beit khnang ba ngin lah ban wad ïa ki lad ki lynti ban ïada ïa la u jong u pud u sam bad ka khyndew ka shyiap. Ngim lah ban tip haduh lano kane ka jingjai-jai ba shipor ha Bangladesh kan neh. Lada ka neh tang shipor, ngim tip sa kaei ka ban jia. Sa kaei kita ki samla pule bad ki nongïakhih kin dawa? Sa katno por kan shim ban wanrah biang ïa ka Bangladesh sha ka lynti kaba dei, kaba skhem, kaba shngaiñ bad kaba don hapdeng ka jingsuk jingsaiñ?
Ngi kyntu ïa ki para nongshong shnong kiba don marjan bad ka Bangladesh ba kin long kiba husiar ha kum kine ki por. Ki shipai BSF kin ym lah ban ïada ïa u pud u sam baroh. Kin don ki jaka ki ban lait. Kin don ki khep ba kin ym lah ban peitngor. Namarkata, hap ban ïashim jingkitkhlieh lang ban ïada ïa la ka jong ka Ri bad ka khyndew ka shyiap. Hynrei ym dei pat ban shim ïa ka aiñ halade. Lada lap ïa ki suba nong Bangladesh kiba wan rung, dei ban bat ïa ki hashwa ban aiti noh sha ki pulit lane ki BSF. Ngim dei ban pynkhluit ïa ka jinglong jingman kaba la rhem lypa. Lada baroh ki ïaleh khluit, mano pat ban tem ïa ka ding? Kane ka dei ka kam kaba khia bad kaba ktah ïa ka lawei khamtam kito ki paradoh parasnam kiba shong ba sah ha Bangladesh bad ki para nongshong shnong kiba sah ha khappud.
Ngi shu kyrmen ba ka jingbha kan wanphai bad ba ngin ïa lait na ka saw ka sian. Ngim dei ban kheiñ sting bad ngim dei ban ïa pan kwah ïoh ngi jah kwah ha kawei ka sngi. Ha kum kine ki por, ngi dei ban ïarap ban peitngor lang bad ym tang ban shu ïa kdew kti iwei ïa iwei pat. Ka khep bad ka jinglong jingman ka dawa ïa ka jingïatreilang jong baroh bad ym ban ïa pyrshang ban shim kabu da kiwei pat ki rukom ïoh ba ka kyrtoh kylla hadien habud. Ka jingïatylli ka long ka bor katba ka jingsaphret kan wanrah ïa ka jingkyllon lang jong baroh.
