Dawki, Nailar 07
Ki nongshong kiba sah ha thaiñ khappud bad ka Bangladesh ki la ïathuh ha u MLA ka BJP u Bah Sanbor Shullai ba ki dang don hapdeng ka jingshngaiñ kumba ka long mynta wat lada ka don ka jingbym shongsuk ha Bangladesh namar ka jingumsnam bad kynrum-kynram ka saiñ pyrthei.
U Bah Sanbor u la lap ïa kane haba u ïakren bad ki nongshong shnong ter ter naduh Dawki sha Pyrdiwah bad ki shnong marjan kiba la pynsngew ha u ha ka por ba u leit jngoh ïa ki jaka khappud bad ka Bangladesh ha ka Sngi Balang.
Ki la ong ba ka jinglong-jingman ha khappud bad ka Bangladesh ka long kaba shngaiñ haduh mynta wat lada ka don ka jingsyier ïoh wan rung beaiñ ki briew na Bangladesh namar ka jingumsnam bad kynrum-kynram saiñ pyrthei kaba jia mynta la katto-katne sngi.
U Bah Sanbor u la leit nyngkong ban peit ïa ka kad khaïi ha Dawki ha kaba u la lap ba ka surok bad khyrdop ban rung sha Bangladesh la khang shwa shipor. La synran lang ïa u Bah Sanbor da ki heh shipai BSF ha ka por ba leit sha kine ki jaka ha khappud.
Ha Pyrdiwah u la ïakynduh ïa ki nongshong shnong bad nongïalam shnong kiba la pynpaw ka jingkmen namar ka jingwan jong u Bah Sanbor kaba long ka jingshngaiñ khamtam namarba u la kren ruh ïa ki shipai BSF kiba long ki nongda kiba hakhmat eh ïa ki jaka khappud.
U Rangbah Shnong ka Pyrdiwah, u Bah Ambrose Khonglah bad ki longkmie ha kane ka shnong ruh ki la pynpaw ba kam don kano-kano ka jingsyier haduh mynta namar ki shipai BSF ruh ki don bad ki long ki nongïada ha ryngkat ka jingïatreilang bad ki bor shnong bad ki VDP kiba la don lypa ban peitngor lang ïa ka jinglong jingman.
U Bah Khonglah u la ong ba ka don ka jingïatreilang bad ki shipai BSF bad kam don kano-kano ka jingeh haba don ka jingsngewthuh jingmut lang hapdeng ki nongshong shnong bad ki bor pahara.
U la ong ba ha ka jinglongbriew ka lah ban don ka jingbym ïa sngewthuh jingmut hynrei ka kut noh haba ïakren bad don ka jingpynbeit.
Ha kawei ka liang, ha ka por janmiet ynda u Bah Sanbor u la wanphai na ki jaka khappud bad ka Bangladesh, u la leit beit-beit ban ïashem ïa u Lat ka Jylla bad pynsngew ha u ïa ka jinglong-jingman katkum ka jinglap jong u ha ka por ba u leit jngoh ïa ki jaka khappud.
U Bah Sanbor u la ong ba u Lat un sa ïakren ruh bad ka Sorkar Pdeng ha kaba ïadei bad ka jingdonkam jong ka Jylla ban ïada ïa ki jaka ha khappud bad ka Bangladesh.
U la ong ba ka jingleit jngoh jong u ïa ki jaka khappud ka long ban tip bad sngewthuh ïa ka jinglong-jingman bad kumba ka long mynta ka don ka jingshong suk shong shngaiñ hynrei ym lah ban tip lypa ïa kaba shibit ne lashai.
U la ong ba ki shipai BSF ruh ki la batai ïa ka jinglong ba la khreh bad peitngor bad pyrkhing bha ïa ka rung ka mih khamtam ban nym don ki briew na Bangladesh kiba ïoh ban rung.
U la ong ba ki la don lypa ruh shi kynhun ki shipai ban ïada ïa ki jaka khappud haba donkam ha kano-kano ka por bad ki bor pahara ki long kiba la kloi ban ïakhun haba jia kano kano ka jingthombor.
