Shillong, Nailar 07
Ka Christian Higher Secondary School ka la pynliem noh ïa ka kynhun ïalehkai na Maharashtra da 1-0 kol na ka bynta ban bteng ïa ka jingjop kaba ar ha ka Subroto Cup International Football Tournament 2024 kaba long ha ka Sngi Balang ha nongbah Delhi.
Kane ka nam jop ka la wan urlong lyngba ka shi kol ba la thep da ka Susimeri Lyngdoh Peinlang na ka bynta ban khur 6 point na ar-sien ïakhun. Kane ka kynhun ka la don jingkyrmen ban rung quarter final na ka Group-D.
Ha kane ka jingïakhun kaba la long ha KIIT Football Ground, katei ka kynhun ki ‘thei ïalehkai Under-17 kaba na na Pahamsyiem Nongpoh ka la lah ban ïalehkai bha naduh kaba sdang bad tang ha ka minit kaba 3 ka la ioh ban pynkhih jar lyngba ka Susimeri.
Kane ka shi kol ka la pynïoh mynsiem ia kane ka kynhun namar ha ka jingïalehkai kaba nyngkong ka la lah ban pynliem ïa ka IPSC haduh 10-1 kol. Haduh kaba kut ka jingïalehkai ka Maharashtra kam shym la lah ban pynphai bad ka la pynlong ïa ka Meghalaya ban khur ïa ka jingjop kaba ar ha kane lympung.
Kane ka kynhun ïalehkai kaba la mihkhmat ïa ka Jylla hapoh ka jingïalam ka Kong Ïaikyntiew Nongkynrih (coach) kan pynkhreh ïa ka jingïalehkai kaba khatduh pyrshah ïa ka Punjab ha ka Sngi Palei ha ka por 3:30 janmiet.
