Jowai, Nailar 07
Ka Dulong ka la ïoh jingjop katba ka Mynthong bad Mookyndur ki la ïakhaid ha ka lympung ïalehkai Under-17 Football Tournament Football Tournament-Independence Day Cup 2024 ba la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium, Jowai.
Ha ka jingïakhun kaba nyngkong, ka Dulong ka la pynliem noh ïa ka Dongmihsngi da 5-1 bad kane ka la wan urlong lyngba u Rio Marboh bad u Nambor Lamat ki la thep mar ar kol.
U Rio u la ïoh ban thep ha ka minit kaba 8 & 54 bad u Nambor Lamat ha ka minit kaba 38 & 56, bad ïa kawei pat la ïarap pynthep da u rangialehkai ka liang pyrshah u H. Patwet ha ka minit kaba 60+1. Na ka liang ka Dongmihsngi ka la lah ban pynphai kylla shi kol lyngba u Heiplantmi Shylla ha ka minit kaba 48.
Ha ka jingïalehkai kaba bud hapdeng ka Mynthong pyrshah ïa ka Mookyndur ki la ïasam mar shi point hadien ba kim shym la lah ban thep kol haduh kaba kut ka jingïalehkai.
