Dhaka, Nailar 07 (UNI)
Ka sorkar ba shipor ha Bangladesh ban khlieh da u nongjop ïa ka khusnam Nobel Prize, u Prof. Muhammad Yunus, kan bam smai ha ka miet jong ka Sngi Palei, la ïathuh u heh duh ki shipai, u General Waker-Uz-Zaman ha ka Sngi Balang.
Haba kren sha ki lad pathai khubor mynta ka sngi, u General Waker u la ong ba katei ka sorkar ba shipor kan bam smai ha ka por kumba 8 baje mynmiet.
Nalorkata, u la ong ba kan don ka Advisory Council ha kaba ki dkhot kin don kumba 15 ngut eiei.
Utei u heh shipai u la ong ba ki shipai baroh kin ai jingkyrshan ïa u Professor Yunus.
“Ngi dang pyrshang ban pynlong ïa ka jingpynbam smai lashai ka sngi (Sngi Palei). Ka la don ka jingai jingmut ban pynlong noh mynta ka sngi. Hynrei u Dr Yunus un dang wan sha Bangladesh lashai ka sngi ha ka por kumba 2:10 mynsngi. Namarkata, ngi la rai ban pynlong noh lashai ha ka por 8 baje mynmiet,” la ong u General Waker.
U la pynpaw ïa ka jingkyrmen ba ka jingjai-jai kan wanphai biang sha ka Ri baroh kawei hapoh lai ne saw sngi bad wat mynta ruh ka jinglong-jingman ha Bangladesh ka la kham biang haba ïanujor bad ki sngi kiba la leit noh.
Ka Bangladesh ka la don hapdeng ka jingartatien hadien ba ka Myntri Rangbahduh, ka Sheikh Hasina, ka la hiar shuki bad phet syndon na la ka jong ka Ri ha ka 5 tarik Nailar na ka daw jong ka jingïakhih kaba jur pyrshah ïa ka bad ka sorkar Awami League. Hapdeng ka 16 tarik Naitung bad mynta, palat 400 ngut ki briew ki la ïap ha ki jingïakhih.
