Shillong, Nailar 07
U Bah Aibor Khongjee uba dei u rangïalehkai uba paw hapoh ka jylla uba la long mynta kum u Coach ka Rangdajied FC, u la pynpaw ba wat la ka Rangdajied FC ka la ïoh por tang ar sngi ban pynkhreh ïa ka lympung Durand Cup 2024 pyrshah ïa ka FC Goa hynrei ki rangïalehkai ki la lah ban ïalehkai bha kaba la long ha ka 5 tarik u Nailar ha madan JN Stadium, Polo Shillong.
U la ïathuh ba hadien ba kawei na ki kynhun kiba don ha ka Group-F kata ka Hyderabad FC ka la kynrandien noh, u trai jong ka Rangdajied FC u Bah Eugeneson Lyngdoh u la pyntip sha u ba ka don ka jingtyrwa na ka AIFF ban ïashimbynta ha kane ka Durand Cup.
“Nga la pan por tang katto katne minit na u Bah Eugene ban pyntip sha ki rangïalehkai hynrei da ka jingkmen baroh ki la kwah ïashimbynta bad mar kumta ngi la ai ktien sha ki bor pynïaid ban ïakhun beit ïa kane ka Durand Cup wat la ha ka por ba lyngkot” u la ong.
U la pynshai ba kane ka jingïashimbynta wat ha ka por ba lyngkot ka long ka kabu ksiar ïa ka Rangdajied namar kan plie ïa ka lad ïa ki samla ba kin ïalehkai bad ki kynhun kiba heh ha India namar ka Durand Cup ka dei ka lympung ïalehkai kaba rim ha India.
U la pyntip ba ka Rangdajied kan sa ïalehkai bha haba kan ïakynduh bad ka Shillong Lajong FC ka ban long ha ka 10 tarik mynta u bnai. Haba phai sha ka jingshah rem ha ka FC Goa, ka don ka jingbakla ha ka minit kaba khatduh ba la shah pynphai hynrei u sngewtynnad haba ki rangïalehkai ki la leh bha ha madan.
“Ka jingslap ka dei ka jingkyrkhu ïa ngi namar ka ai mynsiem ïa ki rangïalehkai haba ngi duna bor met bad ka jingjrong” u la ong.
U la phla ba ki nongkyrshan ki kham bun ki dei jong ka Shillong Lajong hynrei u don jingkyrmen ba ki paidbah kin sa ai jingkyrshan ïa ka kynhun Rangdajied haba kin ïakynduh ha ka Sngi Saitjaiñ hynrei ki paidbah ki kham kyrshan bha ïa ki rangïalehkai kiba lehkai bha ha madan.
U Bah Aibor Khongjee u la shimti kum u Coach ka Rangdajied FC ha u snem 2020-21 bad u don ka thong ba ka kynhun kan ïoh rung sha ka lympung I-League.
Kum ban shu pynkynmaw, ka Rangdajied FC ka la shah rem da 3-4 kol ha ka FC Goa hapdeng ka jingïalehkai kaba jur u slap.
Haba ïoh ban ïakren bad u rangïalehkai shapdeng u Pynbhalang Suting, uba ka shnong trai ka dei na Wahlakhiat, Mawkynrew Block u la pynpaw ba ka jingïoh ban thep ïa ka kol ka jong u ka dei ha ka por ba 61 minit.
U la ong ba hapdeng ka jingïakhun kaba jwat bha haba la ïoh mar lai kol ka FC Goa kaba bha bok ka la ïoh ban thep sa kawei ka kol ban jop syndon.
“Wat la ngi la pynkhreh tang ar sngi hynrei nga sngewkmen ba nga la ïoh ban ïalehkai ha ka Durand Cup” u la ong.
U la pynpaw ba wat la ki Khasi ki kham lyngkot hynrei haba mih ha madan kim ju tieng lada u jrong ne uba heh met hynrei hap ban ïakhun beit ban ïoh thep kol.
