Mawkyrwat, Nailar 08
Ka long kaei-kaei kaba sngewsih bad sngewdiaw ïa ki paidbah nongshong shnong jong ka shnong Domtynrong ha South West Khasi Hills District ha kaba ïa ki jingmyntoi kiba kane ka shnong ka ju ïoh na ka sorkar mynshwa hynrei mynta la kumba 13 tylli ki snem kane ka shnong ka la duh noh ïa u khaw rashon naduh ba ka don ka jingpynrung thymmai ïa ka khanasamari ha u snem 2011.
Ka shnong Domtynrong kaba hap hapoh Mawkyrwat Block ka dei ka shnong kaba jngai tang kumba 23 km na Mawkyrwat. Ka jingdon ki longïing ha kane ka shnong ka long kumba 50 tylli eiei bad kane ka shnong ka dei kaba la rim bha ha Mawkyrwat kaba la kynjoh 62 snem naduh u snem 1960.
U Myntri Shnong ka Domtynrong u Bah Batjuban Snaitang haba ïakren bad ki lad pathai khubor u la ïathuh ba kane ka shnong ha ki por ba mynshwa ka ju ïoh ïa u khaw rashon. Hynrei kaba sngewsih ka long ba naduh u snem 2011 shajrong, ka shnong ka la shah pynduh noh ïa u khaw rashon bad u la ïathuh ba um shym la tip na kaei ka daw ba ki la shah pynduh noh ïa une u khaw rashon.
U la ïathuh ruh ba ka jingduh noh ïa u khaw rashon ka la long ka jingduh jingmyntoi kaba khraw ïa ki paidbah namar kumba 90 na ka 100 ki nongshong shnong ki dei kiba im kyndoi jakpoh da ka kam rep kam riang.
Kumta na ka liang ki paidbah bad ki bor pynïaid shnong ki buh ka jingkyntu ïa u nongmihkhmat ka thaiñ u Bah Renikton Lyngdoh Tongkhar ba un ïarap lem ban pynkren sha ka sorkar halor kane ka jingeh jong ki paidbah.
Nangta, sa kawei pat ka shnong kaba tip kum ka Mawthawiang Nongtwah kaba hap hapoh ka Mawkyrwat Block bad jngai kumba 11 km eiei na Mawkyrwat kaba la ïoh la ka jong ka bor synshar shnong naduh u snem 2001 hynrei kaba sngewsih ka long ba kane ka shnong haduh mynta kam shym pat la ïoh la ka jong ki skhim pynroi kyrpang kum ka jingtrei 100 sngi bad kiwei kiwei.
U Bah Dituland Lyngdoh, Myntri ka shnong Mawthawiang Nongtwah haba kren sha ki lad pathai khubor u la pynpaw ïa ka jingsngewdiaw kaba khraw namar kane ka shnong ka la kynjoh sha 23 tylli ki snem hynrei haduh mynta kam shym pat la ïoh ïa ki skhim lajong bad kumba long mynta ki ïoh tang ka job card bad ki hap ban trei lang bad ka shnong Mawthawiang Nongtraw.
U Bah Dituland u la ïathuh ruh ba ki skhim pynroi kiba ka shnong ka ïoh haduh mynta kum ki lynti ïaid kjat bad kiwei kiwei ban pyntrei bunsien ki dei beit tang ki MLA skhim.
