Shillong, Nailar 08
Ka Ïingbishar Meghalaya High Court ka la ai por ban pynbeit ha kaba ïadei bad ka jingai ‘No Objection Certificate (NOC)’ ban pynlong ïa ka jingïaid pilkrim ki ‘riewngeit Hindu sha krem Mawjymbuiñ ha Mawsynram.
Ka Ïingbishar lyngba u nongbishar Justice HS Thangkhiew ka la pynmih ïa kane ka hukum ha ka Sngi Palei hadien ba la shim bishar ïa ka mukotduma [WP(C). No. 275 of 2024] kaba la mudui da ka kynhun Yatra halor ka jingbym ïoh NOC ban pynlong ïa ka jingleit sha Krem Mawjymbuiñ, Mawsynram.
Dang shen ka Dorbar Shnong Mawsynram ka la pynbna ba ym ai jingbit ban pynlong ka jingïaid pilkrim ban leit sha Krem Mawjymbuiñ namar la pynkylla pynban kum ka jaka lehniam ha kane ka jaka wat lada ka dei ka jaka jngohkai kaba bun ki briew kiba ju leit jngohkai.
Na ka liang ka ïingbishar ka la ong ba katkum ka hukum kaba 07-08-2024, ka la rai ban khot hajir ïa ka Deputy Commissioner bad u Superintendent of Police ka East Khasi Hills ha ryngkat kiwei pat kiba la don kyrteng lang ha katei ka mukotduma ba la ai da ka Yatra.
Ka ïingbishar ka ong ba katba ïaid ka jingbishar bad haba sngap ïa ka jingpynsngew u respondent No. 7 na ka bynta jong baroh lang ki respondent No. 6, 7 & 8, kumjuh ka Deputy Commissioner bad Superintendent of Police, la sngewthuh ba donkam ban ai por kumba la kyrpad da u respondent No. 7 ban pyrshang ban pynbeit ïa kane ka kam ha kaba ïadei bad ka jingai “No Objection Certificate” ban pynlong ka jingïaid shisnem shisnem sha Krem Mawjymbuiñ, Mawsynram.
Kumta ka Ïingbishar ka la buh sngi biang ban shim bishar ha ka 14 tarik mynta u Nailar khnang ban pynlah ïa ki kynhun ban pynsngew sha ka Ïingbishar ha ryngkat ka jingshim rai jong ki.
“Ka Ïingbishar ka khmih lynti ba yn lah ban poi kano-kano ka jingpynbeit kaba long biang lang ha shwa ban poi katei ka sngi kaba la buh ban shim bishar biang,” la ong ka Ïingbishar ha ka hukum kaba la pynmih.
Kumta kane ka hukum ka long ba baroh ki mamla kin wan biang sha ka Ïingbishar ha ka 14 tarik mynta u Nailar ban ïathuh ïa kaei kaba la lah ban pynbeit.
