Dhaka, Nailar 08
Ka Sorkar kaba shipor ha Bangladesh kaba la thaw hadien jingkhyllem noh ka Sorkar kaba ïalam da ka Shiekh Hasina kum ka Myntri Rangbahduh, la pynsmai ha ka Sngi Palei ha kaba u ‘riewpawkhmat jong ka ri, u Muhammad Yunus u la bamsmai kum u nongaibuit uba hakhlieh-duh (Chief Adviser) jong kane ka Sorkar kaba shipor.
U Yunus, 84 snem ka rta u dei uba la ïohpdiang ïa ka khusnam Nobel Peace Prize ha u snem 2006 namar ka jingmaitphang jong u ban kyntiew ïa ka ïoh ka kot ha Bangladesh lyngba ka microcredit bad microfinance, kaba u la leh da ki kam lyngba ka Grameen Bank.
U Yunus u la bamsmai hadien khyndiat kynta ba u la wan poi ha nongbah Dhaka na Paris ha kaba la pynsmai da u President ka Bangladesh u Mohammed Shahabuddin ha ïing sah jong u President ‘Bangabhaban’.
Kiwei pat ki dkhot jong ka Council kiba donbynta lang ban pynïaid ïa ka sorkar kaba shipor ki long u Adilur Rahman Khan, uba pawkhmat bha ban ïakhun ïa ka hok longbriew-manbriew bad uba la shah set patok 2 snem ha ka por jong ka Sorkar ka Hasina, nalor ka nongïakhun ïa ka hok ki kynthei ka Farida Akhtar; u dkhot ka Grameen Telecom u Nurjahan Begum; u foreign secretary barim ka Bangladesh u Touhid Hossain bad AFM Khalid Hossain u nongïalam ka kynhun Hefazat-e-Islam.
U Myntri Rangbahduh ka ri India, u Narendra Modi u la phah ka khubor kitbok ïa u Yunus bad u la ong ba ka India ka kyrmen ban sakhi noh ïa ka jingwanphai ka jinglong-jingman kumba ju long ka suk ka saiñ ha Bangladesh, bad ka ban pyntikna ruh ïa ka jingshngaiñ jong ki Hindu bad kiwei kiwei ki rit paid ha Bangladesh.
U Yunus kum u chief adviser ka Sorkar kaba shipor, u don ka kyrdan kaba syrïem kum ka kyrdan Myntri Rangbahduh ha ryngkat ki dkhot ka Council kaba 16 ngut.
Ki ar ngut ki nongaibuit ki long u Nahid Islam bad u Asif Mahmud, kiba long ruh ki nongïalam kiba hakhmat ha ka jingïakhih kaba poi shaduh u pud ban khyllem ka Sorkar ka Hasina. Haba ai jingkren shwa ban bamsmai, u Yunus u la ong, “mynta ka dei ka sngi bakhraw ïa ngi. Ka Bangladesh ka la thaw ïa ka sngi jingjop kaba thymmai bad ka Bangladesh ka la ïoh ïa ka jinglaitluid kaba ar.”
Haba kyntu ban pynpoi biang sha ka jinglong-jingman kaba suk bad saiñ ha Bangladesh, u Yunus u la ong ïa kine ki kyntien, “ngim lah ban jam tang shi kam shakhmat lada ngim lah ban pynbeit ïa ka jinglong-jingman ka suk ka saiñ. Ka jingkyntu jong nga ïa ki briew baroh ka long ba, lada phi shaniah ha nga, pyntikna ban nym don ka jingthombor pyrshah ïano-ïano, hangno-hangno hapoh ka ri… Ngi dei kawei ka ïing kaba heh.”
