Jowai, Nailar 08
Ki shnong khappud jong ka jylla Meghalaya-Assam kiba kynthup ïa ka Tum-Tum, Myntang, Tiehwieh, Pdeiñlapateiñ, Khatkasla, Psiar, Mowluber, bad Moojem Pyllun kiba hap hapoh ka Tum-Tum Polling station, ha ka 8 tarik Nailar ki la ïakynduh ïa u CEM ka JHADC Bah Thombor Shiwat ban ïakren halor ka jingshah pynngat jong ki sha ka Barato-Mukroh Konstitwensi na ka 13-Saphai Konstitwensi.
Haba kren sha ki lad pathai khubor hadien ka jingïakynduh ïa u CEM, u Waheh shnong Tum-Tum u Bah Wanpyrkhat Lyngdoh bad u Waheh shnong Khatkasla Bah Nangeibormi Lamare, ki la ong ba ki ïeng pyrshah ïa ka jingphiah ïa ki shnong jong ki namar ki dei ki shnong kiba don ha khappud bad ka Assam bad ki dei ruh ki shnong kiba hap ha ki jaka ïakajia pud.
U Waheh shnong Khatkasla Bah Nangeibormi Lamare, u la ong ka jingphiah ïa ki sha Barato-Mukroh Konstitwensi kan buh jingeh ïa ki paidbah nongshong shnong ha ka leit ka wan shaduh sha ka shnong Barato ne Mukroh namar ki hap ban ïaid lynti lyngba ki shnong jong ki jaidbynriew Karbi namarba ka shait mih ka jingïakynad man ka por.
Katba u Bah Wanpyrkhat Lyngdoh u la ong, ka jingjngai ka shnong Tum-Tum na ka shnong Sahsniang ka long tang 2 km, hynrei ka jingjngai na ka shnong Barato pat ka long palat ïa ka 30 km nalor ka surok ruh kaba sniew. Kine ki shnong baroh shikatta ki don bad ka 13 Saphai Konstitwensi, bad u la kynnoh ba ka jingphiah konstitwensi ïa ki, ka dei tang ka buit ban phiah arliang ïa kine ki shnong.
Shuh shuh ki nongïalam shnong ki la ong, katkum ka Notification ba la pynmih ha ka 4 tarik Naitung 2024, ki la ong ba ïa kine ki shnong la pynhap sha ka 14 Sahsniang-Mowkaiaw, bad kim don kano-kano ruh ka jingpyrshah namar la pynhap ïa ki bad ki shnong kiba marjan. Hynrei kaba phylla pat ka long ba hadien ka jingpynsngew paidbah, la pynngat jubor ïa ki sha ka Barato-Mukroh Konstitwensi bad kane ka pyni ba ka jingpynsngew paidbah kam don jingmut eiei.
Kine Hynriew Dorbar Shnong ki la kyntu jur ban pynneh ïa ki hapoh ka 13 Saphai Sahsniang Konstitwensi khnang ba ki paidbah nongshong shnong kin nym mad jingeh hadien habud bad maham ruh lada ka jingdawa ka jong ki kam urlong kin ‘boycott’ ne ym ïashim bynta ha ka ilekshon MDC.
Kine hynriew shnong ki hap hapoh ka Tum-Tum Polling Station kiba don 2000 vote. Na ka liang u CEM u la bthah ïa ki ban phah da ka jingthoh sha u Commissioner ka District Council Affairs namar ba na ka liang ka council kam lah shuh ban leh eiei namar ka la dep ban mynjur ïa ka aiñ rew.
