Shillong, Nailar 08
Ka FC Goa ha ka Sngi Palei ka la lah ban pynliem noh ïa ka Tribhuvan Army FC da 2-1 kol na ka bynta ban bat ïa ka kyrdan ba hakhlieh jong ka Group-F ha ka 133rd IndianOil Durand Cup ha Jawaharlal Nehru Stadium, Polo.
Kane ka nam jop ka la wan urlong lyngba u Lalthangliana bad u Sitroy Carvalho na ka bynta ban pynlong ïa kane ka kynhun kaba la rah teng ïa ka league ha ka Indian Super League (ISL) ban kamai 6 point na ki ar sien ïakhun. Ïa ka kyrdan ba-ar la bat da ka Shillong Lajong FC (3 point), katba ka Rangdajied United FC bad ka Tribhuvan Army ki dang mad ïa ka jingshah rem.
Haba phai sha kane ka jingïalehkai, dei ka FC Goa kaba la ïoh ban pynkhih jar nyngkong eh lyngba u Lalthangliana ha ka minit kaba nyngkong. Kane ka kynhun ka la pynbud biang ïa ka kol ba ar hadien san minit ba la bteng ïa ka kylla miet lyngba u Sitroy na ka bynta ban tam da 2-0 kol.
Hadien katto katne por ka Tribhuvan Army ka la lah ban pynphai kylla shi kol lyngba u Basant Jimba ha ka minit kaba 66. Haduh kaba kut kane ka kynhun kam shym la lah shuh ban pynphai bad ka la mad ïa ka jingshah rem kaba ar ha kane ka lympung.
