Shillong, Nailar 08
Hadien ka jingïakhih ba la pynlong da ka KSU ban leit tur ar-sien sha phyllaw jong ka shlem treikam Meghalaya Public Service Commission (MPSC), ka la pynlong ïa kane ka shlem treikam ban pyndem bad mynjur ruh ban pyllait paidbah noh ïa ki ‘marks’ jong kiba ïakhun ïa ka eksam ba la pynlong da ka Commission hapoh 24 kynta.
Lah ban kdew ba ha ka por mynstep ki nongïalam bad dkhot ka KSU ki la leit tur biang sha phyllaw ka MPSC ban ïakhih da kaba jai-jai. Dei tad ha ka por janmiet ba u Chairman ka Commission u la khot ïakren ïa ki nongïalam ka KSU bad hadien ka jingïakren kaba jrong kaba la neh ar kynta eiei, na ka liang ka MPSC ka la pyndem noh bad mynjur ban pyllait paidbah ïa ki ‘marks’ jong kiba ïakhun eksam MCS bad kular ruh ban weng noh ïa ka Notification ba la pynmih ha ka 6 tarik u Nailar 2024.
Na ka liang u President ka KSU, Bah Lambokstarwell Marngar, u la ong ba ka jingïakren bad u Chairman ka Commission, ka long ban pynshai paidbah ïa ki ‘answer key’ bad lai tylli ki jingkylli ba bakla ha ka Meghalaya Civil Services Preliminary Examination.
Da kaba pynpaw ba kam dei ban don ka jingshah liang ha ka thung kam thung jam, u Bah Lambokstarwell u la ong ba ka MPSC kam dei ban pynmih jingpynbna (advertisement) da kumwei bad leh pat da kumwei ha ki eksam thung kam.
Shuh shuh u la ong ba ka Commission ka la mynjur ruh ban pynduh ïa ka Public Notice kaba la pynmih ha ki khyndiat sngi ba la dep bad bynrap ba lada ka don ka jingthep kam buit-tuh hangta kan don ka bamsap.
U Bah Lambokstarwell u la ïathuh ruh ba u Chairman ka MPSC u la kular ba hapoh ka 24 kynta ka MPSC kan pyllait paidbah noh ïa ki ‘marks’ jong ki samla pule kiba ïakhun ïa ka eksam MCS bad kular ruh ban pyllait paidbah ïa ki mark jong ki samla pule haba shit ba shai ïa 3 tylli ki jingkylli ba la bakla.
U la ong ruh ha kaba ïadei bad kam MPS, ha ka Advertisement ba la pynmih ha u snem 2019, ka ratio ka long 1:2.5 katba ha ka MPSC ka la pynkylla da kumwei kata sha ka 1:1.5., ha kaba u Chairman un nym lah ban shim rai marwei bad kin sa shim rai hadien shi sngi-ar sngi hadien ynda ïa shong pyrkhat lang.
U la ong kane ka jingwan tur ka seng sha ophis ka MPSC kam dei ban wan leh ‘drama’ lane ban pynhun ïa ka KSU hynrei ka dei na ka bynta ban pynhun ïa ki khun samla kiba la thep bad kiba la ïakhun ha ka eksamin.
