Ka Jaidbynriew jongngi ym tang ka donkam ïa ki kam pynroi pynpar ha ka Jylla. Kaba kham donkam ka long ban kyntiew pynneh pynsah ïa la ka jong ka ktien ka thylliej, ka riti ka dustur, ka rep ka riang, ïa ki khlaw ki btap bad kaba kham kongsan ka long ban ioh wad noh da kawei ka kyrteng thymmai jong ka Jylla kaba ïa dei bad ïa hap bad ki trai muluk trai bri hapoh ka Jylla. Kum ki Khasi – Jaiñtia bad Garo. Namar kane ka kyrteng MEGHALAYA kam shym don jingïadei ei ei bad ki trai muluk trai Bri kumba long lem kiwei kiwei ki Jylla ba marjan. Ka kyrteng Meghalaya ka nang pynjah duh syndon ïa ki trai muluk ki trai bri kiba dei hok ban ïoh ïa ka kyrteng kaba ïa dei bad ki kum ka Jaidbynriew ba la shong la sah hangne lyngba ki spah snem ba la leit. Kum ka nuksa ki Assamese ki ïoh ïa ka kyrteng jong ka Jylla da ka Assam, ki Naga ka Nagaland, ki Manipuri ka Manipur ki Mizo da ka Mizoram. Katba ki Khasi – Jaiñtia bad Garo, ym shym la shim da ka kyrteng jong ki briew ïa ka Jylla la shim pynban da ka ri ki LYOH, ka bym sngew ïahap hangno-hangno bad ki briew ba shong ba sah ha kane ki Lum ba itynnad ka Bri u Hynñiew Trep Hynñiew Skum bad Achik. Kumta na ka liang u paidbah ka Jylla kiba dei ki trai muluk trai bri ki da thrang haduh katta katta ban ioh jer kyrteng thymmai noh ïa ka Jylla da kawei ka kyrteng kaba ïa dei bad ïa hap bad ki briew ka Bri u Hynñiewtrep bad Achik. Kumta kiwei kiwei ki Jaidbynriew kim nym ïoh leh mon shuh haba ka syrnod kaba biang ngi don bad sakhi kum ka Jylla u Khasi – Pnar bad Garo, ym ka Jylla ki lyoh kumba long mynta. ïa kane ka kam ka shong eh ha ki nongmihkhmat (MLA) trai muluk trai bri ban pynioh da ka kyrteng kaba pynhun jrut ïa baroh kiba don ka snam nylla Khasi – Jaiñtia bad Garo, khlem da sngew ïapher jait, kynja bad niam bad kiwei kiwei. Namar ka dei hok ka kyrteng jong ki trai muluk trai bri ban ai bad shon shap ban jer kyrteng ïa ka Jylla ha ka kyrteng bad ka nam ha ki trai muluk trai Bri. Ym ha u wan wir wan hap ne u khyllah poiei. Ka kyrteng ka Jylla kaba donkam tam eh ban im ka Jaidbynriew Khasi – Pnar bad Garo.
C.B.Iawphniaw
