Shillong, Nailar 08
Hadien ba ka la don ka jingkynnoh rahbor bad dawa pisa da ki dkhot ka All Khasi Hills Achik Federation (AKHAF) ha Bakli ïa ki ar ngut ki rangbah na ka shnong Nongprut bad Langkyna, West Khasi Hills District ha ka 4 tarik u Nailar 2024, na ka liang ki nongïalam ka AKHAF ki la ong ba kane ka jingshah kynnoh pyrshah ïa ki nongïalam ka dei kaba bakla bad ka bym dei satia kaba shisha.
Kum ban shu kdew hangne, katei ka jingjia ka la jia ha ka 4 tarik u Nailar 2024, ha ka por kumba 2 baje eiei mynstep katba kitei ar ngut ki dang wan buh briew na Bakli, SWKHD. Ynda ki la poi ha lad Bakli, kyndit kynsan kawei ka kali kaba don ïa u nombor ML- 12 3708 ka la beh ïa ki nadien bad na ka liang jong kitei ar ngut ki la ïathuh ruh ba hadien ba ki la pynsangeh ïa ka kali, na katei ka kali la mih 5 ngut ki briew kiba kam ïalade ba ki dei na ka seng AKHAF ba la ïalam da u Vikesh D. Marak na ka shnong Bakli, Khonjoy, SWKHD.
Shuh shuh kitei ar ngut ki la ïathuh ruh ba kitei ki briew ka AKHAF ki la dawa pisa bad namar ba kim don pisa ki la shah shoh bad shah rahbor sha khlaw ha ryngkat ka byrngem byrsit. Ynda la shai ka bneng ki la pyllait noh ryngkat ka byrngem-byrsit ba lada ki lap biang ba ki wan sha katei ka jaka kin thang bad kali bad briew.
Na ka liang kitei ar ngut halor katei ka jingjia, ha ka 6 tarik u Nailar 2024 ki la leit ban ujor da ka FIR ha thanat Nonghyllam pyrshah ïa kitei ki briew bad ki la kyrpad ruh ïa ki bor jong ka aiñ ba kin kem bad pynshitom ïa kitei ki briew katkum ki kyndon aiñ.
Haba pynshai halor kane ka bynta sha ki lad pathai khubor ha ka 8 tarik u Nailar 2024 ha Shillong Press Club, u Manuel Ch. Marak, General Secretary ka AKHAF, u la kyntait ïa kine ki jingkynnoh da kaba ong ba dei tang ka jingsngewthuh bakla bad kyrpad ïa ki paidbah kim dei satia ban pynsaphriang kulmar ïa ki khubor lamler namar ka lah ban ïalam sha kino-kino ki jingjia ki bym sngewtynnad.
“Kitei ki jingkynnoh ki long ki bym dei bad kiba bakla namar ka khlem jia shisha kumba la kynnoh, kumta ngi kyrpad ïa ki paralok jong ngi ba kim dei ban pynsaphriang ïa ki khubor ki bym dei namar lyngba ki khubor kiba thok ki lah ban ïalam sha ki jingjia kiba sngewsih hapoh ka imlang-sahlang jong ngi”, la ong u Manuel.
U Manuel u la ong ba kitei ar ngut ki briew ki la kam ïalade kum ki nongñiah kali kamai hynrei ki dei ki nongkhaïi masi tuh sha Bangladesh kaba la pynlong ïa ki dkhot ka AKHAF ban pynsangeh ïa ki da ka jingmut ba ki dei ki nong Bangladesh kiba wan rung tuh shapoh India namar ka jingïakynad hapoh Bangladesh bad ka khlem don satia kano-kano ka jingjrong kti ïa kitei ar ngut ki briew kumba la kynnoh.
“Ha ka jingshisha katkum ka jingïoh jingtip jong ngi, kitei ki briew kim dei ki nongkamai kali hynrei ki dei ki nongshalan masi tuh, kaba la pynlong ïa ki dkhot jong ngi ban bat ïa kitei ki briew da ka jingmut ba ki dei ki briew napoh Bangladesh”, la ong u Manuel.
Shuh shuh Manuel u la ong ba kum ka seng ruh lada ki don kino-kino ki dkhot jong ka kiba shoh-dat ïa kitei ar ngut kan nym ailad satia ïa ki. Hynrei lada kitei ki jingkynnoh pyrshah ïa ka seng pat da kitei ar ngut ki rangbah kim dei kiba shisha, ka wanrah ka jingsngewsih bad pynbudnam ïa ka seng da kaba kynnoh lamler.
