Shillong, Nailar 08
Ka Hills Farmers Union (HFU) ka la leit ban tied jingkhang biang ïa u CEM ka KHADC u Bah Pynïaid Sigh Syiem namar ka jingbteng ban ot kilo ki nongkhaïi ha Ïewduh bad kiwei ki jaka.
Haba ïakren bad u Bah Commander Shangpliang, President ka HFU, u la ong ba u CEM u la kular ban shna noh ïa ki kyndon hadien ba u Lat ka jylla u la dep mynjur ïa ka aiñ haba ïadei ka jingot kilo ki nongkhaïi ïa ki nongrep bad u kyrmen ba ka KHADC kan sa pyndep noh kloi khnang ban lait ka jingshah ot kilo ïa ki mar dep namar haduh mynta lada dei 100 kilo ki nongkhaïi ki ot beit 10 kilo.
U la ïathuh ba mynta ha ka por lyiur haba la sdang mih ki mar rep bad ynda la poi ha Ïewduh ki la shah ot kilo ha ki nongkhaïi. Kumta ki la wan ban ïakynduh ïa u CEM namar ba ka KHADC ka la dep thaw ïa ka aiñ khang pyrshah ban ot kilo.
U la pyntip ba u Bah Pynïaid un pyndep ban thaw ïa ki kyndon hapoh shibnai bad dei ban don ki briew ki ban peit ha ïew namar lada don ba ot kilo kin lah ban ujor.
U Bah Commander u la ong ba ïa u sohmynken haba ki wan die da ka plastik ki dang shah ot kilo kane ka la pynlyngngoh ïa ki nongrep.
Ha ka juh ka por u la ong ba ki nongkhaïi ki la ïoh ïa ka bhah haba ki die ïa ki mar rep bad kin ïohnong biang da kaba ki ot kilo ïa ki mar rep.
