Shillong, Nailar 08
Ki nongïalam bad dkhot ka Khasi Students’ Union (KSU) ha ka step Sngi Palei ki la leit tur biang sha phyllaw jong ka shlem treikam Meghalaya Public Service Commission (MPSC) bad dawa hiar shuki noh ïa u Chairman bad Secretary jong ka Commission.
Kane ka jingleit tur biang jong ka KSU sha shlem treikam ka MPSC ka long halor ka jingkyntait jong ka commission ïa ki jingdawa jong ka seng, kata ban pyllait paidbah ïa ki marks jong kiba ïakhun ïa ka eksam MCS bad ruh ban pynbeit ïa ka rukom thung kam thung jam.
Lah ban kdew ba dang mynshem taïew ruh ka KSU ka la dep ban leit tur hakhmat jong katei ka shlem treikam ban pynpaw halor ka jingbym biang ka rukom pynïaid kam pynïaid jam ha kaba ïadei bad ka rukom thung kam thung jam.
Ha kane ka sngi, ïa ki dkhot ka KSU la ïalam na khmat da u President samla Lambokstarwell Marngar ryngkat u General Secretary samla Donald V Thabah. Mar ïa poi ha phyllaw jong kane ka shlem treikam ki dkhot ka KSU ki la sdang shwa da ka jingpyrta ‘slogan’ ban dawa hiar shuki ïa u Chairman bad Secretary ka MPSC.
Nalor ka jingpyrta slogan, la sakhi ruh ba ki dkhot ka KSU ki la rah ïa ki ‘banner’ kiba don ïa ki jingthoh pynrem, kata ka MPSC ka mut Meghalaya Politician Servant Commission, ka ïing wanrah kam ka MPSC, ka jingthep kam tuh ka MPSC, shaniah ïa ka MPSC, lah kumba shaniah ïa ka ïing skum bad ka jingleh thok leh shukor (Scam) ha ka eksam MCS mynta ka dei ka jingleh thok leh shukor ïa ka lawei ban wan.
Na ka liang jong ki dkhot ka KSU ryngkat ki nongïalam ki la thang ruh ïa ka tyngshop jong ki bor pynïaid ka MPSC ïa kaba la thang ha surok hakhmat jong ka khyrdop ka Commission ha ryngkat ka jingpyrta “Ka hok jong ngi wat ju leh kai-Wat ju leh kai-Wat ju lehkai” bad “MPSC down down”.
Haba kren bad ki lad pathai khubor, u samla Lambokstarwell u la kynnoh ba ki kyntait (ka MPSC) ban pyllait paidbah ïa ki marks hadien ba ki la don 6 ngut ki samla kiba pyrshah, ki long tang ki jingaidaw bad pyrshang ban buhrieh ïa kaei-re-kaei. “Lada ka don shisha ka jingtreikam kaba shai ha ka MPSC, ka jingkylli ka mih balei ba lapmiet ban pynkylla ïa ki jingkren, jingpynshai na ka Commission,” u la ong.
Une u nongïalam ka KSU u la ong ruh, “Ngim lah ban sngewthuh ïa kum kaei kata ka jinghap buhrieh ba ki kren. Haba bun kiba ïakhun ïa ka MCS ki la wan ïakynduh ïa ka KSU bad pynpaw ïa ka jingdonkam ban pynthikna ïa ka jingtreikam kaba shai ha ka thung kam da kaba sei paidbah ïa ki marks jong ki, hynrei balei ka MPSC ka pyrshang ban buhrieh ïa kane.”
U la pyntip ba ka KSU kan ïai bteng ban ïakhih tad haduh ba ka MPSC ka la pyntreikam ïa ki jingdawa ka seng ban pynthikna ïa ka jingthung kam kaba shai bad ban pynkut syndon ïa ka jingthung kam bahaïing ne jied ïa kiba ithuh-ithaw. Kane ka jingkren u samla Lambokstarwell ka dei kaba u la kren mynsngi sha ki lad pathai khubor ha shwa ban shah khot leit ïakynduh ïa u Chairman ha ka por janmiet.
“Ngim kwah ba ka MPSC kan dei ka jaka ban ïalum pisa ne ka jaka ban pynsngewbha ïa ki Myntri Sorkar, ki ‘riew saiñ-pyrthei ne ki heh ophisar hynrei kum ka seng ngi dawa ban don ka jingtrei kam khuid hapoh ka MPSC,” la ong u samla Lambokstarwell.
