Kathmandu, Nailar:
Katkum ki khubor, la ong ba ka liengsuiñ ‘helicopter’ ka la leit hap bakla sha ka phang Pdeng jong ka Nepal ha ka Sngi Balang ha kaba 5 ngut ki briew ki la duh noh syndon ia ka jingim ha katei ka jingjia kynthup ia u nongñiah jong katei ka liengsuiñ bad ki 4 ngut ki ‘riew shang kai pyrthei kiba dei ki nongshong shnong ka China.
Hynrei, la ong ba kum kine ki jingjia kim long shuh kiba sngew pher ne khyllah hapoh katei ka ri, namar ki ju bun bha kum kitei ki jingjia naduh ki por ba la leit ruh.
La ong ba katei ka liengsuiñ ‘Air Dynasty’ ka dei kaba dang thmu ban leit hiar sha Syabrubesi, hadien ba ka la mih na ka jaka ieng napoh ka nongbah Kathmandu ha katei ka sngi.
