Shillong, Nailar 08
Ka kynhun ki rangïalehkai hockey ka India ka la khur ïa ka takma rnong kaba ar sien lynter ha ka Olympic, hadien ba ka la lah ban pynliem noh ïa ka Spain da 2-1 kol ha ka jingïalehkai ban ïaknieh ïa ka kyrdan kaba lai ha Paris ha ka sngi Palei.
Kane ka nam jop ka la wan urlong lyngba u Harmanpreet Singh uba la ïoh ïa ar tylli ki penalty corner ha ka minit kaba 30 bad 33 na ka bynta ban pynlong ïa kane ka kynhun ban khur syndon ïa katei ka takma ha ka Paris Olympics 2024 ha Stade Yves-du-Manoir. Kham hashwa ka Spain ka la ïoh ban pynkhih jar nyngkong eh lyngba u kapten u Marc Miralles, uba la lah ban pynurlong lyngba ka penalty stroke ha ka minit kaba 18.
Kumba ka paw ka India ka la khur ïa ka takma rnong ha Tokyo kaba long ka sien kaba nyngkong ha ki 52 snem. Khaba khatduh eh ba ka India ka la khur takma ar sien ha ka Olympics ka dei ha u 1968 bad 1972.
Kane ka takma rnong ka la long kaba biang pura na ka bynta u rangapkol ka kynhun u P.R Sreejesh u ban sa shongthait noh na kane ka kam ïalehkai hadien ki 18 tylli ki snem kiba u la don bynta bad ka kynhun ïalehkai ka ri India. Une u rangapkol u la lah ban pynpaw ia ka jingtbit ha kaba u la lah ban pyllait na ka jingshah thep ha u kapten ka Spain u Marc Miralles na ki penalty corner.
Ki rangïalehkai ka India ki la lah ban ïashan tyngeh na ka bynta u Sreejesh haduh ban da kut syndon ka jingïalehkai hashwa ba kin ai khublei khatduh ïa utei u rangapkol ba kynsai uba la 36 snem ka rta. Ïa kane ka jingtbit ka jong u ha ka kam ialehkai yn ïai kynmaw ha ka khana jong ka jingïalehkai hoc-key jong ka ri.
Kumba ka long mynta ka India ka la khur da saw tylli ki takma rnong na ka Shooting lyngba u Swapnil Kusale ha ka 50m Rifle, kumjuh ka Mmanu Bhaker bad u Sarabjot Singh ha ka Mixed Team 10m Air Pistol bad kawei pat ba la khur da ka Manu Bhaker ha ka 10m Air Pistol.
