Nongstoiñ, Nailar 08
U nongbud jong kawei ka trok ba la tip kyrteng kum u S Kumar, 22 snem na Jharkhand u la khlad noh ha shen hadien ba ka trok kaba u bud ka la kylla ha kawei na ki jaka hapoh ka shnong Riwiang ha West Khasi Hills District.
Kane ka la jia ha ka 8 tarik u Nailar 2024 ha ki por kumba 3 baje janmiet. Katkum ka khubor na ki heh pulit ka district la ong ba katei ka trok kaba don ïa u nombor JH04-AB-1503 kaba dang wan na West Bengal da ka jingthmu ban leit sha ka karkhana saiñ nar ha Riwiang hynrei mar ïa poi ha katei ka jaka ba long riat kumno-re-kumno ka la kylla noh.
Ka khubor na ki heh pulit, ka ong ruh ba utei u nongbud ka trok u la shah ban ha katei ka trok haduh ba un da khlad noh ha shen bad ka la shimpor ban ïoh sei ïa ka met ka jong u. Pynban lyngba ka jingwan ai jingïarap na ka tnat Fire and Emergency Service la lah ban sei noh ïa ka met ba sahkut ha ka por kumba 7 baje janmiet.
Shuh shuh la ïathuh ruh ba ïa u nongñiah jong katei ka trok la pynkit noh mar-mar sha ka jaka ai jingsumar na ka bynta ban pynïoh ki lad jingsumar ba kyrkieh.
Halor katei ka jingjia ki pulit ki la pynrung mukotduma bad ka jingtohkit ka dang ïaid shakhmat.
