Tura, Nailar 08
U MDC ka Tura u Bernard N Marak uba dei ruh u nongaiktien ka BJP u la thoh sha u Myntri Rangbah ka Jylla u Conrad K Sangma ban kyrpad buh ïa ki ïing dara (camp) na ka bynta ki Garo, Khasi bad kiwei ki jaidbynriew kiba la kylla phetwir namar ka jinglong jingman ha ri Bangladesh.
“Nga kwah ban kyrpad ïa phi ban buh noh da ki ïing dara na ka bynta ki Garo, Khasi bad kiwei ki jaidbynriew kiba wan rung sha India na Bangladesh bad ban pynbiang ïa ki ka jaka sah shipor halor ka jingsngew para briew. Ka jingkhyllem ka Sorkar ha Bangladesh ka la wanrah ka jingduh ïa ki mynsiem briew bad ruh kito kiba jam sha shiliang lyngba ka khappud ki don ha ka jingsyier ban shah kem bad shah siat,” la ong u Bernard ha ka shithi ba la phah sha u Myntri Rangbah.
Na ka liang jong une u MDC ka BJP u la sngew ba ïa kito kiba la dep ban jam sha shiliang dei ban ithuh bad ban pynsah ha ki ïing dara.
Shuh shuh u Bernard u la sngew ba “Ki don bun ki riewlum ba kynthup ïa ki Garo ha Bangladesh bad lada ki kwah ban wan wad jingïada hapoh ka jylla jong ngi, dei ban ai jaka bad pynsah shipor ha ki ïing dara bad ban sa phah biang shisien ba ka jingsuk kan wan phai biang.”
U la kdew ïa ka rukom long jong ki ‘Mahari’ hapdeng ki Garo, ïa kaba u sngew ba dei ban pyndonkam ban ïarap ha ka ban ithuh, ai jaka sah shipor bad ha kaba phah leit phai biang sha ka ri na kaba ki wan. “Baroh ki Maharis ki don ïa ka kur chatchis ha Bangladesh bad ha kum kane ka por jong ka jingeh jingjynjar, ïa kine ki briew dei ban ai jaka sah shipor ha ka jaka ban phai da ka dien bad ieh ïa ki ban shah lehbeiñ, shah pynïap,” la ong u Bernard.
