Ka khubor jong ka jingpynkhreh ki lai ngut ki MLA ka seng Congress ban ryngkang noh sha ka seng National People’s Party (NPP) hashwa ban sdang ka Dorbar ki MLA mynta u bnai, kan nang pynswai ïa kane ka seng khamtam hadien ka jingshah rem kput jong u President ka Meghalaya Pradesh Congress Committee (MPCC), u Bah Vincent H Pala, ha ka ilekshon MP Lok Sabha. Hynrei kam dei shuh ka baphylla ba ka Congress kan nang stait hapoh ka jingïalam u Bah Pala. Une u nongïalam ka Congress uba la shah thung ha ka All India Congress Committee (AICC) kum u President ka MPCC ha u snem 2021 u la sakhi ïa ka jingmih jong kiba bun ngut ki MLA hashwa ka ilekshon MLA ha u snem 2023 haduh ba ym don shuh wat tang uwei uba la neh ha ka seng napdeng kito kiba la jop na ka Congress ha u snem 2018. Ka la long shisha ka jinglehraiñ ba kat ka Congress ka khlem don shuh wat uwei ruh u MLA uba treh ban ïakhun na ka seng kaba u la jop san snem mynshwa. Kam pat ju jia kumne ha ka mynnor jong kane ka seng kaba la synshar la bun snem ha Meghalaya.
Ha ka ilekshon MLA ha u snem ba la lah, ka Congress ka la jop san ngut, hynrei da ka jingshah jied jong u Saleng A Sangma kum u MP ka Tura mynta u snem, kane ka seng ka sah sa tang saw ngut, bad mynta, lai ngut na ki, ki mut ban leit noh sha ka NPP namar kim sngewïahap jingmut shuh bad u Bah Pala. Ngi lah ban ong ba kine ki san ngut kiba la jop ha u snem 2023 ki dei kiba la jop na ka bor lajong bad ym than na ka daw jong ka seng ne jong u Bah Pala namar wat ïalade ruh u la shah rem na shnong lajong na Sutnga-Saipung ha ka kyrtong ka NPP. Haba tang ïalade ruh u khlem lah ban jop, kumno ka AICC ka ailad sah ïa u Bah Pala ban ïalam ïa ka seng Congress? Imat kane ka seng kam kwah shuh ban khie im ha Meghalaya bad ka la shu rai kut beit ban hiar arsut.
Ki la don ki jingïakren sharum shaneng hadien ka jingshah rem jong u Bah Pala kum u MP ba kito kiba la phet na ka Congress ki kloi ban wanphai biang lada ka AICC ka weng shwa ïa u na ka shuki President MPCC. Ha ka jingshisha, ka AICC kam dei ban tieng ban weng ïa u Bah Pala namar kan ym don jingktah eiei. Ka la dei ban sngewthuh shai ba dei ka jingleh stad jong ka AICC hi kaba la pynlong ïa ka Congress ha Meghalaya kumba ka long mynta. Lada dei ba ka khlem wanrah da u Bah Pala, ka Congress kan jin da la leh bha ha ka ilekshon MLA. Hynrei ka dei ka jingsniewbok jong kane ka seng hi ba ka leit jia long noh ba u Bah Pala u la shah thung na Delhi kum u President ka MPCC. Tangba ngim pat ïohi pat ba ka Congress, wat hadien ba ka la jop 99 ngut ki MP ha ka ilekshon MP, ba kan kwah ban pynkhie im ïalade ha kane ka jylla. Haduh mynta, ki nongïalam ka AICC kim pat I khih ban wanrah jingkylla ha Meghalaya.
Ngim tip shuh kaei ka ban jia ïa kane ka seng ha ka ilekshon MDC ha Khasi Hills Autonomous District Council (KHADC) bad ka Jaiñtia Hills Autonomous District Council (JHADC). Kumba ka long mynta, ka seng kaba la ïoh lyer bha ka dei ka Voice of the People Party (VPP). Ngi la ïohi kumno u kyrtong jong kane ka seng u la pynliem kput ïa ka Congress ha ka ilekshon MP watla ki la don kiba kob ba u Bah Pala un jop biang ha ka sien kaba saw namar ki ‘vote’ ba jar-jar. Hynrei kita ki ‘vote’ ba jar-jar ki la shah tyllep noh ha kiwei pat kiba la kwah ban ïohi bad mad ïa ka jingkylla namar kim sngewkwah shuh ban ailad ïa u juh u briew ba un leit mihkhmat ïa ki sha Lok Sabha. Ha ka jingshisha, ka AICC ka la dei ban wanrah noh da kiwei pat ki nongïalam kiba kham tbit ban treikam paidbah ha ka jaka jong u Bah Pala uba baroh ngi tip ba um dei satia u ‘riew saiñpyrthei. Kam ïahap ban buh nongïalam da ki bym dei ki ‘riew saiñpyrthei namar kan wanrah ïa ka jingjot hadien habud.
Watla ki jingïakren hapoh ka Congress ban bat ïa kitei ki lai ngut ki MLA ka dang ïaid, hynrei ki dak ki shin ki paw ba ki la rai ban leit noh sha ka NPP. Lada kine ki pynïasoh pura bad ka NPP, ka aiñ kam khang lad. Bad lada ki leit, ka jingdon MLA ka NPP tang nalade kan kot sha ka 31 ngut, bad kane ka mut ba ka NPP ka la lah ban synshar tang marwei khlem da donkam shuh ïa kiwei pat ki seng saiñpyrthei kum ka UDP, HSPDP, BJP, bad ki MLA khlem seng. Hynrei kam pat don ka dak ba ka NPP kan bret noh ïa kine ki seng kiba la kyrshan ïa ka naduh ba dep ka ilekshon. Lehse ka lah ban nang buh shwa ïa ki bad hadien katto katne por kan sa shim da kawei pat ka rai. Nangne shakhmat, ngin hap ban shu ïa ap bad peit kaei ka ban jia ha ka saiñ hima sima jong ka Meghalaya khamtam ynda ki lai ngut ki MLA ka seng Congress kin wan ban rung noh sha ka NPP, bad kaei pat ba ka AICC kan leh ïa u Bah Pala bad lada ka don ne em ka saiñdur ban pynkhie im ïa ka seng ha kane ka jylla.
